Sikkerneq Markusilu NAKUUSAp Tasiilamut ilagilerpaat
NAKUUSA UNICEFilu arfininngorneq 24 august tasiilamukassapput, tassani meeqqat inuusuttuaqqallu periarfissaqassapput meeqqat isummersorfiinut ilaasortanngornissaminnut taassumalu saniatigut meeqqat pisinnaatitaaffii atuarfinnilu Nakuusaaqqanik suliaqarnissamut ilinniartitsisut pikkorissarneqassallutik.
Angalanermi KNR radiomi tv-milu meeqqanut aallakaatitassiortartoq Sikkerneq Olsen aammma arsaattartoq ukioq mannalu silami final six ingerlanneqarnerani klubbini Nagdlunguak peqatigalugu pissartanngortoq Markus Jensen peqataassapput.
Taakku saniatigut Meeqqat Isummersorfiini ilaasortat marluk Mathias Ludvigsen Meeqqat Isummersorfiat Qeqqata Kommuneaniittoq aamma Nivi Rosing Meeqqat Isummersorfiat Kommuneqarfik Sermersuumiit, tunumi meeqqat, Meeqqat Isummersorfiini suleqataanissaannut kaammattorniarlugit peqataassapput.
”Nuannaarutigaarput Sikkerneq Olsen KNR-imiit peqataassammat, Tasiilaminngaanniillu KNR sinnerlugu assigiinngitsunik meeqqanut aallakaatitassiortussaammat. Isumaqarpugut kalaallit meerartaanut tamanut pingaartuusoq tunup ilinniarneqarnissaa. Sikkerneq meeqqanut attaveqallaqqissuuvoq qilanaarpugullu pingasunngornerup unnuani ataatsimuualaartitsinissami aqutsisorinissaanut, tassani Sikkernerup saqqummiutissavai Tasiilami NAKUUSAP Meeqqat Isummersorfittaavat.”
Ataasinngorneq 26 august nalunaaqutaq 19:00-miit 21:00 tungaanut katersortarfimmi tamanut ammasumik NAKUUSA UNICEFilu suliaminnik saqqummiissapput, marlunngornermi nalunaaqutaq 19-21 katersortarfimmi Markus Jensen arsaattartuunini saqqamilu inuunerisani pillugit saqqummiissaaq, Pingasunngornermilu innuttaasut tamarmik qaaqquneqassapput hallemi unnussiuaarnermut 18:30-miit 20:00 tungaanut pisussami, tassani pingaartorsiutigineqassaaq tunumi NAKUUSAp meeqqanut isummersorfittaarnera.
Unnussiuaarneq naggaserlugu NAKUUSAp inussuanik sanasoqassaaq.
”Angalanitsinni Tasiilami meeqqat Markus Jensen peqatigalugu arsamik pinnguarnissamut unamminissamullu periarfissaqassapput. Pingaartissimavarput meeqqat peqqinnartumik sammisaqartinnissaat taamaattumik nuannaarutigaarput Markusip Tasiilami meeqqat inuusuttuaqqallu peqatigiartorlugit ilaassammat ”
Markus Jensen ukioq kingulleq Maligassiuisut showimi Elite Sport Greenlandimiit timersornikkut takutitsilluarsimasutut innersuunneqarpoq, tassani arsaattartutut tunniusimassutsini peqqutigalugu aammalu Tjekkiet-mi Generali Cupeqarnerani unammersuarnermi arsallammattut toqqarneqarluni.
Sapaat 25 august nalunaaqutaq sisamaniit tallimat tungaanut Tasiilap arsaattarfiani meeqqat arfineq pingasuniit aqqaneq marluk tikillugit ukiullit Markus Jensen arsaqatigiartorsinnaavaat, taamatuttaarlu nalunaaqutaq tallimaniit arferngup tungaanut 13-iniit 18-inik ukiullit arsaqataajartorsinnaallutik.
Aammattaaq ataasinngornermi 26 august nalunaaqutaq sisamaniit arfernut tungaanut Tasiilap arsaattarfiani Markus Jensen meeqqanut 13-iniit 18-iut ukiulinnut sungiusaqatigiartorneqarsinnaavoq.
NAKUUSAp aamma qaaqquai meeqqat meeqqerivimmi angajullerneersut Tasiilami Minihallenimut sisamanngorneq tallimanngornerlu nalunaaqutaq 10:00-miit 11:30-ip tungaanut, tassani Markus Jensen naapinneqarsinnaajumaarpoq.
Mati Nivilu Meeqqat Isummersorfii Qeqqata Kommunianiit aammalu Kommuneqarfik Sermersuumiit atuarfimmi anitsiarfinni ulluni ataasinngorneq 26 aamma 27 august naapinneqarsinnaajumaarput, tassani meeqqat tusarsinnaajumaarpaat Meeqqat Isummersorfiini ilaasortaalluni suliassat suunersut. Meeqqat Isummersorfiinut ilaasortanngornissaq aamma periarfissaajumaarpoq.
NAKUUSAp UNICEFillu Tasiilamukarnerat ilaatigut Gentoftemi 2018-mi UNICEFimut katersuiniarnermit aningaasalersorneqarpoq.
Meeqqat isummersorfiinut ilaasortanngorneq NAKUUSAp nittartagaani www.Nakuusa.gl 27 augustip tungaanut periarfissavoq.