Arfeq itersarsuarmiit peqatigiilluta qaqissavarput

NAKUUSA’p UNICEF’illu meeqqat pisinnaatitaaffii aammalu NP Nunarsuarmi anguniagaat pillugit ataatsimeersuartitsinerat sisamanngormat naammassisoq innersuussutinik arlalinnik erseqqissunillu kinguneqarpoq, Meeqqallu pisinnaatitaaffiisa siunissami qulakkeerneqarnissaat anguniarlugit innersuussusaqartuupput NAKUUSA’p Meeqqanut Siunnersuisoqatigiivi, meeqqanik inuusuttunillu suliniaqatigiiffiit, suliffeqarfiit, kommunellu. Eqaannerusumik piumassuseqarfiusumillu susassaqartut akornganni suleqatigiittoqarnissaa orniginartinneqarpoq.

Arfeq itersarsuarmiit kisimiilluni qaqinneqarsinnaanngilaq – arlaqarluni peqatigiillunilu aatsaat qaqinniartariaqarmat
Taamatut oqarpoq NAKUUSA’p UNICEF’illu novembarip 27-iani 28-ianilu 2019 Katuami ataatsimeersuartitsinerat ingerlanneqarmat suliffeqarfinni meeqqat pisinnaatitaaffiinik suliniuteqarneq pillugu saqqummiisoq.

Oqariaaseq taanna aallaaveqarpoq Inuit Pisinnaatitaaffii pillugit institutimi pisortaq Jonas Christoffersen, saqqummiussinermini Afrikami oqariaaseq inuit peqatigiiaarlutik ataatsimoorussillutillu kivitsinissaannut tunngasoq assersuutigimmagu, meeqqat pisinnaatitaaffiisa siuarsarneqarnissaannut tulluartillugu assersuuteqarluni.
Oqariaaseq taanna eqqartuinerni arlalinni uteqattaarneqarpoq. Pisortani susassaqarfiit akimorlugit suleqatigiittoqarsinnaanera eqqaaneqallattaagami, tassa pisortat ingerlataat, suliffeqarfiit, meeqqanik suliniaqatigiiffiit allallu kattuffiit suleqatigiinnissaat uteqattaarneqartuarami.

NAKUUSAp Meeqqanut Isummersorfiisa innersuussineri akorluarneqaqaat

NAKUUSA’p Meeqqanut Isummersorfii ukiumoortumik Meeqqat ataatsimeersuartinneqarneranni innersuusiaminnik ataatsimeersuarnerup ulluani siullermi sassarrapput saqqummiussillutillu. Meeqqat innersuussutaat tassaapput atuarfinni inunnik isumaginnittunik atorfinititsisoqassasoq: meeqqat pisinnaatitaaffii pillugit atuartitsisoqartarnerussasoq, sullissinerillu meeqqanut tunngasut sukkanerusumik piffissallu sivikitsup iluani naammassineqartarnissaat ilaatigut aamma piumasaqaatigaat. Innersuussutigineqartut suliffeqarfinnit, kommunenit, Namminersorlutillu Oqartussanit akorluarneqarsimaneri ataatsimeersuarnerup inaarutaasumik innersuussutaani takuneqarsinnaavoq.
NAKUUSA’p innersuussutaasa ilaat Meeqqat Isummersortarfianni ilaasortap ingammik una uummammioraa: atuarfinni tamani inunnik isumaginnittumik atorfinitsitsisoqarnissaanut tunngasoq.

Angajoqqaakka avimmata uanga nammineerlunga inunnik isumaginnittumik ikorfartorneqarnissara pisariaqartillugu misigereerpara. Taamaattumik siunnersuutip taassuma akorluarneqarnera nuannaarutigaara. Taamaasillutami nunatsinni meeqqat uattulli ikorfartorneqarnissaat qanilliallanneqarmat nuannaarutigeqaara
Malik Lund, NAKUUSAp Meeqqat Isummersorfiini ilaasortaq

NAKUUSAp Meeqqat Isummersorfiisa aamma innersuussutigaat ilinniartitsisut allallu meeqqanik sullissisut ataavartumik pikkorissarneqartarnissaat, meeqqamik ikiorneqarnissamut pisariaqartitsisumut takunnissinnaanngortillugit qisuariarsinnaanngorsinneqarniassammata.

Innersuussutit tigussaasut arlaqarput

Ataatsimeersuarneq naggaserlugu suleqatigiissitanik innersuusiortussanik suliaqartitsisoqarpoq, taakkunani meeqqat pisinnaatitaaffii qanoq ilillutik pitsanngorsarneqarsinnaanersut siunnersuutigineqarput: eqaatsumik suleqatigiissinnaanissaq, suliffeqarfinnilu sulisut meeqqaminnut tunngasunik aallussinissaannut periarfissaqartinnissaat, kommuneni sunngiffinni suliniaqatigiiffinnik ingerlatsisut pitsaasunik avatangiiseqartinneqalernissaannut iliuuseqartoqarnissaq, inersimasullu meeqqanut naapikkuminartuni suliffeqartut pikkorissartinneqartarnerisigut inersimasut meeqqanut toqqissisimanartut angujuminartullu pigineqalernissaat eqqartorneqarpoq, assersuutigalugu inissialerisut, timersortarfimmi aqutsisut, inunnik isumaginnittut meeqqat ornittagaani tamani, atuarfinni pigineqalernissaat ilanngullugit, ilisimasat paasissutissallu avitseqatigiiffiunerulernissaat, sutigullu tamatigut meeqqanik peqataatitsinerulernissaq.

Innersuussutigineqartut tamaasa katersorlugit allappagut, tigussaasumik iliuuseqartoqarnissaanut atugassanngorniarlugit. Ingammik meeqqat pisinnaatitaaffiisa ilisimaneqarnerulernissaasa anguneqarnissaat aammalu Meeqqat Pisinnaatitaaffii pillugit Isumaqatigiissut aallaavigalugu meeqqanut isiginneriaatsit erseqqarissarnissaat eqqarsaatigaakka, nuannaarutiginerpaavarali peqataasut tamarmik suleqatigiinnissamut, meeqqallu isaanniik isigalutik peqataatitsiniartumillu eqqarsarmata
Sara Olsvig, UNICEF Danmarkip Kalaallit Nunaanni suliniutaanut pisortaq

Nunarsuarmi anguniakkat qitiutinneqarput

NP nunarsuarmi anguniagaat piujuartitsisumik ineriartortitsinissaq, nunarsuarmilu anguniakkat nunarsuarmioqatigiit peqatigiillutik tamanut, minnerunngitsumillu meeqqanut, pitsaanerusumik siunissaqartitsinissaat, ataatsimeersuarneq tamakkerlugu aallaavigineqarput.

Suliffeqarfiit, kommunet, Namminersorlutillu Oqartussat nunarsuarmi anguniakkanut tunngatillugu suliniutaat tamavimmik qanoq meeqqat pisinnaatitaaffiinut attuumassuteqartigilluinnarnerat isigalugu pissanganarluinnarpoq. Nunarsuarmi anguniakkat sisamaat pitsaassusilimmik ilinniagaqarsinnaaneq arlaleriarluni taaneqartarpoq, aammali anguniakkat pingajuat peqqissutsimut inuunerissaarnissamullu tunngasoq kiisalu anguniakkat 17-at suleqatigiiaarnissamut tunngasut ilanngunneqartuarput. Aammattaaq nunarsuarmi anguniakkat inuit pisinnaatitaaffiinut, tassunga ilanngullugit meeqqat pisinnaatitaaffiinut tunngasut, peqataasunik tigussaanerusumik kattussuussiffigineqarnissaannut aallaaviulluarput, taamaasillutillu NP eqqartugassanngortitaannut attuumassuserneqarlutillusooq
Najaaraq Møller, NAKUUSA-mi ataqatigiissaarisoq

Meeqqat inuunerinnerulernissaat anguniarlugu meeqqat oqartussaaqataanerat

Tigussaasumik iliuuseriniagaq aamma ataatsimeersuarnermi saqqummiunneqarpoq, tassalu INI A/S’ip meeqqat oqartussaaqataanerulernissaat anguniarlugu najugaqarfinni suliniutaa, najugaqarfinni aalajangiussanut meeqqat peqataatinneqarnissaannut tunngasoq maanna inerisarneqaleruttortoq.

Meeqqat akuliunneqaraangamik aalajangeeqataatinneqaraangamillu qanoq alliallatsigisarnersut, persuarsiortigisarnersut, akisussaaffimmillu tigusillutik saqqummertarnersut NAKUUSA’mi takujuarpagut.
Najugaqatigiiffinnilu meeqqat peqataatillugit oqartussaaqataatinniarneqarnerat pitsaalluinnartuuvoq, suliniutillu malinnaaffiginissaa qilanaaraarput. Oqalugiartut arlallit meeqqat tusaaneqarnissaat aalajangeeqataatinneqarnissaasalu pingaaruteqassusaat oqaatigaat – NAKUUSA’mi qularutiginngilluinnarparput meeqqat akisussaaffimmik tigusinissaminnut piareersimalluinnartut, meeqqallu tamanut pitsaasumik inuuneqarnissaq aqqutissiorluarusukkaat aamma qularutiginngilarput.
Pinerillu tamaasa takujuarparput meeqqat qinigassinneqaraangamik pitsaasumik aaqqiissutissanik tikkuussisuaannartut, meeqqanut iluaqutaasumik.
Ataatsimeersuarnermi oqalugiaatinut oqallinnernullu pitsaalluinnartunut qujavugut
Najaaraq Møller, NAKUUSA-mi suliniummi ataqatigiissaarisoq

Meeqqat pisinnaatitaaffiinut tapersiineq pingaarutilimmik naqissuseqqippaa

Meeqqat Pisinnaatitaaffii pillugit Isumaqatigiissutip ukiuni 30-ngortorsiornera ilutigalugu NP nunarsuarmi anguniagaat pillugit ataatsimeersuarneq ingerlanneqarpoq. Ukiunik 30-ngortorsiorneq nunarsuaq tamakkerlugu nalliuttorsiutigineqarpoq, aamma Kalaallit Nunaanni, tassanilu Naalakkersuisut Siulittaasuata Nunarsuarmi Meeqqat Ulluanni novemberip 20-iani aammalu ataatsimeersuarnerup ammaanersiorneqarnerani Meeqqat Pisinnaatitaaffiinut Kalaallit Nunaata tapersersuinera naqissuseqqippaa isumaqatigiissutillu atuutsinneqalernissaanut piumassuseqarneq naqissuserlugu.

Nunami politikkikkut aquttup qullersaata Meeqqat Pisinnaatitaaffiinut tapersiilluni naqissusiinera nunarsuarmioqatigiit sinnerinut oqariartuutaavoq pingaarutilik, meeqqat pisinnaatitaaffiinik pimoorissinermik imalik. Kalaallit Nunaanni nunat tamarmik peqatigiillutik meeqqat pisinnaatitaaffiinik kivitseqatigiinnissaannik oqariartuutaavoq pingaaruteqarluinnartoq. Naalakkersuisut Siulittaasuata taamak pingaaruteqartigisumik oqaaseqarnera UNICEF’imiit nuannaarutigeqaarput, suleqataasussallu taamaasa peqatigalugit sulinissatsinnut qilanaarpugut
Sara Olsvig, UNICEF Danmarkip Kalaallit Nunaani suliniutaanut pisortaq

NAKUUSA’p UNICEF’illu ataatsimeersuarnermi innersuussutaasut tamanik takuneqarsinnaanngornissaat anguniarlugu katersorpai.

Assimi takuneqarsinnaavoq Naalakkersuisut Siulittaasuat Kim Kielsen, NAKUUSAp UNICEFillu ataatsimeersuartitsinerat ammarlugu 27 november oqalugiartoq.

Ammaanersiornermi oqalugiartoq