NAKUUSA Københavnimi nipilioqataavoq
Ulloq 14 Januar Nakuusami Meeqqat Isummersorfianeersut meeqqat tallimat Københavnimut Nunat avannarliit meerartaasa ataatsimeersuarnissaannut peqataajartorlutik tikipput.
Ulloq 15 januar pilersaarut ualikkut aallartinneqarpoq, tassani tikilluaqqusineq pinnguaatillu imminut ilisareqatigiilernissaannut tunngasut pinnguarineqarlutik. Taakku pereermata ullormi ataatsimeersuarfissami piareersartoqarpoq sungiusaatinik assigiinngitsunik sammisaqartoqarluni. Ilaat meeqqat avannaamioqatigiit oqalliffiat sinnerlugu oqaaseqarnissamut, ilaat aalajangersakkamik saqqummiinissamut, ilaat nittartakkatigut siammarterinissamik ilaallu video’aqqamik sanalluni saqqummiinissamik ilinniarlutik.
Ulloq 16 januar meeqqat inaarutaasumik aalajangersagaq suliarivaat ualikkullu inersimasunut saqqummiullugu, saqqummiinermi ilaatigut nunatsinniit Isumaginninnermut Naalakkersuisoq Martha Abelsen aamma Meeqqat illersuisuat Aviâja Egede Lynge peqataapput. FN by-miinneq naggaserlugu nuannattoqassaaq unnukkullu ataatsimeersuarneq naggaserlugu Nunat Avannarliit meerartaat paarsisullu DGI Byen-imi nerersuarput bowlingerlutillu.
Aalajangersakkap inaarsarnerata kingorna meeqqat nunaminnit inersimasut peqataasut ataatsimeeqatigaat ataatsimoorlutik iliuuseqarnissamut pilersaarusiorlutik. Meeqqat Kalaallit Nunaanneersut Naalakkersuisoq Meeqqallu Illersuisuat meeqqat atuarfianni atuartitaanermi meeqqat pisinnaatitaaffiinik ilinniartitsilluarnerusoqarnissaa pillugu iliuuseqartoqassasoq isumaqatigiissuteqarfigaat.
Ilaatigut ataatsimiinnermi isumaqatigiissutigineqarpoq Ilinniartitaanermut Naalakkersuisoq Ilinniartitsinermullu Ilisimatusarfik meeqqat oqariartuutiminnik toqqaannartumik anngussinissaat pillugu ataatsimeeqatigineqassasut.
Nunat Avannarliit Meerartaasa aalajangersagaliaat.
Ataatsimeersuarneq aalajangersakkamik naammassisaqarfiuvoq, aalajangersakkat meeqqat nammineerlutik isumassarsiarivaat, aalajangersakkami qulequttat assigiinngitsut pingasuupput iluanilu immikkoortoqarlutik siunnersuutinik qanoq iliorluni naammassineqarsinnaanerannik, soorlu ilaqutariit iluani, atuarfimmi, inuiaqatigiinnilu. Aalajangersakkami qulequttat pingasuusut tassaapput:
• Meeqqat Pisinnaatitaaffiisa ilisimaneqarnerulernissaat
• Meeqqat inuusuttullu peqataatinneqarnerulernissaat
• Meeqqat inuusuttullu inuiaqatigiinni akuutinneqarnissaat
Taakkunani ataatsimi immikkut maluginiarneqarsinnaasut ilagaat Kalaallit Nunaanni iluatsilluartumik atorneqartoq tassa Meeqqat Inuusuttullu peqataatinneqarnerulernerat.
NAKUUSA-mi meeqqanik inuusuttuaqqanillu peqataatitsineq ingerlalluarpoq, nunatsinni NAKUUSA kommunet tamaasa maannakkullu aamma nunatta kangiani Meeqqanik Isummersorfeqarput, taakku saniatigut atuarfiit tamarmik Nakuusaaraqarlutik. Tulluusimaarutigaarput suliniuterput ”Uagut ulluinnarput- Uagut niperput” maluginiarneqarsimammat taamaasillunilu Nunat Avannarliit NAKUUSAp periusaa assigalugu kommuniminni Meeqqat Isummersorfiinik pilersitsissallutik aalajangersakkamut ilanngussimmata.
Katrine Brandt UNICEF Danmakip Kalaallit Nunaanni allaffiani ilinniartoq ataatsimeersuarnermullu meeqqanik angallasseqataasoq oqarpoq.
Meeqqat pissarsiaqarput
Angalanermi Meeqqat Isummersorfianniit peqataasut assigiinngitsunik pissarsiaqarput, neriuuteqarput maluginiagaqarsimallutillu.
Nuannaraara inuit kikkulluunniit ilaasinnaatitaanerat, assersuutigalugu ataatsimeersuarnitsinni meeraq tusaasaqarsinnaanngitsoq peqataavoq
Minik Olesen Qeqqata isummersortartuineersoq taama oqarpoq.
Maluginiarneqarpoq Nunani Avannarlerni aamma pingaartitat assigiinngisitaarmata.
Nunat allat isumai uagutsinniit allaanerugaluarlutik isumaat torrattaqaat, neriuppunga angerlarutta eqqarsaatigisinnaagigut, uagut Kalaallit Nunaanni Meeqqat Pisinnaatitaaffiisa ilisimanissaat pingaartipparput ukuli nunani allaneersut silaannaap allanngoriartornera annerusumik pingaartippaat. Neriuppunga uagut aamma pingaartilissagipput
Nivi Rosing Sermersuup isummersortartuineersoq oqarpoq.
Meeqqat nutaanik ilikkagaqarput aamma nutaamik isiginnittariaatsimik takupput. Nunani Avannarlerniit ataatsimiigiartunik allanik kammattaartorput. Kalaallit Nunaannullu angerlassallutik nutaanik ilikkagaqarsimallutik Kalaallit Nunaannut iluaqutaasinnaasunik.
Meeqqat Pisinnaatitaafiini nalunnginnittut procent qassiunersut paasivara, aamma paasivara Meeqqat Pisinnaatitaaffii meeqqap paasisariaqarpaa peroriartornermini iluaqutissarimmagu
Ulla-Maria Brandt Nunatta kangiata isummersortarfianeersoq naggasiivoq.