Kalaallit Nunaanni Meeqqat
pillugit isumaqatigiissut ukiuni 30-ni
Ulloq 11. maj 2023 Kalaallit Nunaani Naalagaaffiit Peqatigiit Meeqqat Pisinnaatitaaffiinut isumaqatigiissutaata atuutilernerarit ukiut 30-nngorput. Ulloq pingaartorsiorfiusoq UNICEF Kalaallit Nunaanni-mit aaqqissuunneqarluni nalliussitinneqarmat peqataasut nuimasut arlaqarput.
Naalakkersuisut Siulittaasuat, Múte Bourup Egede aamma UNICEF Danmarkimi genalsekretæri, Susanne Dahl aamma UNICEF Kalaallit Nunaanni suliniutinut pisortaq, Maliina Abelsen, Katuami Naalagaaffiit Peqatigiit Meeqqat Pisinnaatitaaffiinut isumaqatigiissutaata atuutilerneranit Kalaallit Nunaanni ukiut 30-nngornerat pillugu oqalugiarput.
”Maani isersimasut tamatta neriorsoqatigiitta meeqqat tusarnaassallugit aalajangeeqatigissallutigit aamma neriorsoqatigiitta meeqqat toqqissisimasumik peroriartortikkusullutigit tamannami minnerpaamik suliassaaraarput,” Naalakkersuisut Siulittaasuat, Múte Bourup Egede oqalugiarnermini oqarpoq.
Susanne Dahlip namminersorlutik oqartussat UNICEF aamma NAKUUSAp suleqatigiilluarnerat pingaarnertut oqalugiarnermini oqariartuutigaa:
”Suleqatigiinneq UNICEFimi nuannaarutigalugulu tulluusimaarutigingaarparput. NAKUUSA aqqutigalugu ilaatigut Nakuusaaqqat atuarfinni 26-ni aammalu Meeqqallu Isummersorfii arfineq-marluk Kalaallit Nunaat tamakkerlugu siaruaqqasut pilersippagut.”
Naalagaaffiit Peqatigiit Meeqqat Pillugit isumaqatigiissusiaata malinnissaata pilersaarusiorneranni Naalakkersuisut maanna alloriaqqinnissaminnut piareerput, meeqqat inuusuttullu pillugit politikkikkut aalajangiisoqartussaatillugu meeqqat peqataatinneqartarnissaat qulakkeerniarlugu inatsisiliortussanngormata.
Tassungalu tunngatillugu UNICEF Kalaallit Nunaanni qanoq piviusunngortinneqarsinnaanersoq pilersaarusiamik piareersaasimavoq:
”UNICEF-ip Kalaallit Nunaanni politikkikkut aalajangiisoqassatillugu meeqqat oqariartuutaannik tusarnaarnissaq qanoq inatsisitigut peqataatitsisoqarsinnaanersoq siunnersuutaa saqqummiutissavarput. Ukiummi amerlavallaartut meeqqanut tunngasunut alajangiisoqassatillugu meeqqat aperinngitsoortarpagut. Taakkuuppummi siunissamik piginnittuusut,” Maliina Abelsen, erseqqissaavoq.
Uani pilersaarut takuuk: https://nakuusa.gl/
Meeqqat pisinnaatitaaffiisa oqallisigineqarnerat
Ukiuni 30-ni meeqqat pisinnaatitaaffiinut tunngatillugu alloriarnerit annertuut pisimapput. Sulili unammilligassaqaqaaq. Taakkuupput meeqqanit ilisimasalinnillu filmimi ataatsimeersuarnermi takutinneqartumi, oqariartuutigineqartut. Aamma ilaatigut meeqqat tusarnaarneqartutut, eqqartuinnarneqartutulli iliuuseqarfigineqarneq ajortutut misigisartut oqariartuutigineqarpoq.
Oqallinnermi Naalakkersuisoq Mimi Karlsen, borgmesteri Ane Hansen, borgmesteri Avaaraq S. Olsen, Qeqqata Kommuniani Kommunalbestyrelsimi ilaasortaq, Evelyn Mølgaard, Meeqqat illersuisuat Aviâja Egede Lynge, Inatsisartuni ilaasortat Eqaluk Høegh aamma Inatsisartuni ilaasortat Bjørk L. Kristensen qanoq ililluta meeqqat timikkut tarnikkullu innarlerneqannginnissaat ilaatigut oqallisigaat. Qanoq meeqqat pisariaqartitsillutik ikiorneqarnissaasa qulakkeerneqarsinnaanerat aamma oqallisigineqarpoq.
Kalaallit Nunaanni Meeqqat pillugit isumaqatigiissut ukiuni 30-ni
