Kalaallit Nunaat meeqqanik peqataatitsinermut nunarsuarmi pitsaanerpaat ilagilersinnaavaat

World Childrens Dayimut atatillugu UNICEF Kalaallit Nunaanni oqallinnissamut Aki-Matilda Høegh-Dam, 17-nillu ukiulik Maya-Natuk taavalu Puk Draiby Kalaallit Meerartaaneersoq qaaqquneqarput. Oqallisigineqarsimapput meeqqanut tunngasunik aalajangiisoqassatillugu meeqqat peqataatinnerunissaanut qanoq ililluta pikkorinnerulersinnaanerluta.

Ataasinngormat novemberip 20.-ni Københavnimi World Childrens Day FN Byenimi peqataasut amerlangaarmata ini ulikkaarpoq. Tassani UNICEF Kalaallit Nunanni meeqqat inuunerannut tunngasunik aalajangiisoqassatillugu meeqqat peqataatinneqarnissaat pillugu oqallitsitsisuupput.

Meeqqat tusarnaarnissaat peqataanissaallu eqqartorneqarpoq. Soormi meeqqat suleqatiginissaat eqqartorutsigu,” Maya-Natuk 17-nik ukiulik oqalliseqataasoq oqarpoq.

”Politikeritut qinikkatut inuit sinnerlugit sullitakka tusarnaartarpakka. Mikrofonerivaannga. Taamatuttaaq meeqqat mikrofonerissavaatigut. Imaanngilaq meeqqat inersimasut suliassaat suliassarimmassuk inatsisinilu paragrafiliussammata. Taakkuuppulli misilittagaqarlutillu inersimasut ajunngitsumik inatsisiliornissaannut takorluugaqartut. Taamaammat misigisaat, piviusuat sinnattuilu pillugit tusarnaartassavagut,” Aki-Matilda Høegh-Dam, oqarpoq.

Oqalliteqataasimasut tassaapput Maya-Natuk Nuummeersoq, Naalagaaffiit Peqatigiit Meeqqat Pisinnaatitaaffii pillugit Komitéannut siunnersortitut Childrens Advisory Teamimi ilaasortaq siornatigullu Meeqqat Isummersorfiini ilaasortaasimasoq. Folketingimi ilaasortaq, Aki-Matilda Høegh-Dam, aamma siornatigut Meeqqat Isummersorfiini ilaasortaasimasoq. Taavalu Kalaalit Meerataani pisortaaneq Puk, illersuisinut aaqqissussaq Najorti pillugu oqaluttuarpoq.

UNICEF Kalaallit Nunaanni pisortaasimasoq, Maliina Abelsen oqallinnermi aamma peqataavoq. NAKUUSA, Namminersorlutik Oqartussat UNICEF-lu, meeqqat pisinnaatitaaffii pillugit ilisimasaqartoqarnerulernissaa – meeqqallu Meeqqat Isummersorfii aamma Nakuusaaqqat aqqutigalugit peqataatinnerulernissaat anguniarlugit suleqatigiiffiuvoq.
Maliina Abelsenip erseqqissarpaa Kalaallit Nunaat meeqqanik peqataatitsinermi siuarsimasoq:

”Kalaallit Nunaanni politikerit tungaanniit meeqqanik tusarnaarusussuseqarnerujartorneq takusinnaavarput. Qanittumi Naalakkersuisut siulittaasuat, Múte B. Egede nunatsinnilu borgmesterit arlaqartut NAKUUSAp Meeqqat Ataatsimeersuartinneqarnerannut peqataapput. Múte B. Egedep meeqqat 24. november innersuussutitik aalajangersaganngorlugu tunniutilerpatigit aggersarpai.

Kalaallilli Nunaanni meeqqanik peqataatitsinermut suli pikkorinnerulersinnaavugut, Maliina Abelsen isumaqarpoq.

”Kalaallit Nunaanni nunarsuaq tamakkerlugu nunat akornanni meeqqanik peqataatitsillaqinnerpaat ilaanniilersinnaavugut Naalakkersuisut anguniakkamut inersimasut meeqqat oqariartuutaannik tusarnaarnissamut anguniagartik pingaartippassuk, NAKUUSAmi Meeqqat Isummersorfii nukittunerulissappata inatsisitigullu meeqqat peqataatinneqarnissaanik qulakkeerinnittumik aalajangiussisoqarsinnaappat,” Maliina Abelsen oqarpoq.

Paasititsivortaaq politikkikkut aalajangiisoqassatillugu meeqqat peqataatinneqarnissaannut tusarniarnissaannullu periusissaasinnaasumik NAKUUSA saqqumiisimasoq.