UNICEF-ip Kalaallit Nunaanni allaffeqarfia nutaamik suliniutinut pisortartaarpoq

Januaarip aallaqqaataani Tina Dam UNICEF-ip Kalaallit Nunaanni allaffeqarfiani suliniutinut pisortanngussaaq. Maliina Abelsen paarlallugu.

Tina Dam Sisimiuni peroriartorpoq, inuuninilu tamaat Kalaallit Nunaanni najugaqarluni – Københavnimi ilinniartuunera eqqaassanngikkaanni, tassani Niels Brock-mi suliniutinut aqutsisutut ilinniarsimavoq, Københavns Unicersitetimilu Arktiske Studier-mi kandidatimik ilinniagaqarluni.

Kingorna sulisoqarnermut tunngasunik ilinniagaqarpoq MBA-millu aamma ilinniagaqarluni. Taassuma saniatigut ukiorpassuarni aqutsisutut atorfeqartarsimavoq, taavalu inuit pisinnaatitaaffiinut meeqqallu atugaannut tungnasunik misilittagaqarluarluni.

Kingullertut Inuit Pisinnaatitaaffii Pillugit Siunnersuisooqatigiinni allattoqarfimmi aqutsisutut atorfeqarpoq, siornatigullu Pinerluttunik Isumaginnittoqarfimmi aqutsisutut atorfeqarnikuuvoq, taamatuttaaq Kommuneqarfik Sermersuumi Ilaqutariinnut Isumaginnittoqarfimmi aqutsisutut atorfeqarnikuulluni taavalu MIO sioqqullugu Meeqqat Inuusuttullu Pillugit Ilisimasaqarfimmi MIPI-mi, Meeqqat Inuusuttullu Illuanni Mælkebøttimi kiisalu Ilaqutariinnut, Kultuurimut, Ilagiinnut Nalingiissitaanermullu Naalakkersuisoqarfimmi atorfeqarnikuulluni.

Suliffimmi avataani meeqqat inuusuttullu pillugit aamma ilisimasaqarluarpoq, suliffimminut tunngatillugu ilisimasaminik, kisianni aamma nammineq kajumissutsimik suliaqartarnerminit. Nuummi Unnuarissani nammineq kajumissutsiminik suleqataasarpoq, peqatigiiffimmilu ”Nordisk Forening mod Børnemishandling og Omsorgssvigt”-mi aamma siulersuisuniilluni.

”UNICEF-mi suleqataalernissara assut qilanaaraara, taamatuttaaq Kalaallit Nunaanni meeqqanut inuusuttunullu sunniuteqarluartumik suleqataalernissannut qilanaarlunga. Atorfiginikuusanni tamani inuiaqatigiinni sanngiinnerusumik inissisimasut sullitariuaannarnikuuakka, suleqatillu pikkorissut peqatigalugit meeqqanut pitsaasumik sunniuteqarnissaq taavalu meeqqat oqartussaaqataanissaannik suliaqarnissaq qilanaarisupilussuuara,” Tina Dam oqarpoq.

UNICEF Kalaallit Nunaat pillugu paasissutissat

UNICEF FN sinnerlugu meeqqanik ikiuiniaqatigiiffiuvoq, suliffeqarfiullunilu meeqqanik ikiuinerpaajusoq, tassami meeqqat inuuniarneranni inuunermilu ingerlalluarnissaannik ikiugarai.

UNICEF-ip Kalaallit Nunaanni Naalakkersuisut suleqatigalugit NAKUUSA pilersippaat, tassaasoq meeqqat pisinnaatitaaffiinik siuarsaanissamik suliniut, taavalu meeqqat namminermut tunngasunik aalajangiisoqassatillugu peqataatinneqartarnissaannik suliniuteqartoq, tamannalu meeqqanut inuunerannullu pingaaruteqarluinnarluni.

UNICEF Kalaallit Nunaanni Timersoqatigiit Kattuffiat, Paarisa, Pisiffik, Kalaallit Nunaanni Politiit taavalu Kalaallit Nunaanni Assammik arsartartut Kattuffiat suleqatigalugit meeqqat pisinnaatitaaffiisa taavalu Naalagaaffiit Peqatigiit Meeqqat Pisinnaatitaaffii Pillugit Isumaqatigiissutaata siammarnterneqarnissaa anguniagaraa.