Pisiffimmi sulisut inuusuttut mentoreqalerput

Pisiffimmi sulisut 22-t siulliit maanna mentoritut imminnut taasinnaanngorput. Mentorinngorniarluni ilinniarneq nutaaq naammassisimalerpaat, taakkuuppullu Pisiffimmi sulisunik inuusuttunik ikiuillutillu tapersersuisussat.

Naasunnguaq Berthelsenip tulluusimaangaarluni ullumikkut sulisut 22-t Pisiffimmi sulisunut inuusuttunut mentorinngorlutik ilinniarsimalersut pilluaqqusinnaanngorpai. Naasunnguaq Berthelsen Pisiffimmi Sulisoqarnermi immikkoortortaqarfimmi pisortaavoq, nalunaarutigaalu mentorinngorlaat Pisiffimmi sulisut inuusuttut suliffeqarfimmi ineriartorluartinniarlugit tapersersorlugillu aqqutissiussagaat.

Mentoreqartitsineruttaaq inuusuttut suliaminnut inuttullu ineriartornerat pitsaanerulersillugulu suliffeqarnikkut siunissaqarluarnissaannut piareersassavaat.

”Pisiffimmi sulisutsinnut inuusuttunut mentorit siulliit ilinniarsimasunngorneri nuannaarutigalugulu tulluusimaarutigaara. Pisiffimmi inuusuttut suliffeqarfitsinni ineriartorluarnissaannut ikiorniarpagut, ilinniarnissaannut suliffeqaannarnissaannullu kajumissaarlugit – suliffimmi qaffakkiartornissamut tunngavilerniarlugit. Taamaammat mentoreqartitsineq UNICEF peqatigalugu pilersipparput”, Pisiffimmi pisortaaneq, Per Steen Larsen, oqarpoq.

UNICEF ilaatigut Pisiffiup Naalagaaffiit Peqatigiit Meeqqat Pillugit isumaqatigiissusiaannik toqqammavilimmik meeqqanut inuusuttunullu isigeriaaseqarnerup ineriartortinnerani suleqatigaarput.

”Pisiffiup – mentoreqartitsilernerminni aammalu meeqqanut inuusuttunullu isiginnittariaaseqalernerminni inuusuttut pisinnaatitaaffiinut siunissaannullu akisussaaffimmik tigusinerat nuannerpoq”, Tina Dam, UNICEF Kalaallit Nunaanni suliniutinut aqutsisoq, oqarpoq.

Mentoreqartitsineq Pisiffiup sulisut inuusuttut ineriartornerisa isumannaatsuunissaasalu pitsaanerulernissaanut suliniutini atuutsiligaasa ilagaat.

”Pingaartumik inuusuttut atugaat ineriartornerallu suliaqarfiginerini isumaqarpunga Kalaallit Nunaanni suliffeqarfinni pitsaanerpaanissatinnik anguniagarput angusinnaagipput. Meeqqanut inuusuttunullu politikkitta pitsaanerulernissaanik ataavartumik suliaqarnitsinni pisussaaffigaarput suliffimmi avatangiiseq, sulisut ataasiakkaat atugarissaarnerulernissamut iluatsinnissamullu periarfissaqalersitsisoq, pilersissallugu,” Per Steen Larsen nassuiaavoq.

”Isumaqarpunga suliffimmi avatangiisigissaaneq sulisut nalerisimassusaannut suliaqarluarsinnaanerannullu aalajangiisuusoq. Aqutsisugut pikkorissut, suliffeqarfillu inissaqartitsillunilu peqataatitsitsoq aqqutigalugit, piffik kikkunnut tamanut naleqartitsisoq ataqqinniffiusorlu anguniarparput, Pisiffiup pisortaanera naggasiivoq.

Erseqqinnerusumik paasissutissat
Erseqqinnerusunik paasisaqarniarlutit attavigisinnaavatit:
• Pisiffimmi sulisoqarnermi immikkoortortaqarfimmi pisortaq, Naasunnguaq Berthelsen, tlf. +299 38 11 59
• UNICEF-imi attaveqaqatigiinnermi advocacymilu siunnersorti, Mette Schmidt, tlf. +299 56 06 26