Parisimi isumaqatigiissut
aallartissutaannaavoq

”Nunarput Parisimi isumaqatigiissutip ilanngunnera pingaarutilimmik alloriarneruvoq, aallarniutaannaavorli. Tamattalu suleqatigiilluta, oqaloqatigiilluta iliuuseqaqatigiillutalu, siunissaq piujuartitsisoq isumannaatsorlu angusinnaavarput.”

Tassaapput Kalaallit Nunaata pisortatigoortumik Parisimi isumaqatigiissutip atuutilerneranut tunngatillugu Hans Egedep illuani aaqqissuussinermi Kalaallit Nunaanni meeqqat inuusuttullu sinnerlugit oqaaseqartup, Niklas-ip 14-nik ukiullip oqaasii.

Niklas NAKUUSAmi Meeqqat Isummersorfiini ilaasortaavoq. 2021-mi aamma 2022-mi Meeqqat Ataatsimeersuartinneqarneranni meeqqat silap pissusaata allanngoriartornera piujuartitsinerlu pillugit eqqartuipput. Taakkunani innersuussutit arlallit inernerineqarput. Innersuussutaasa ilaat tassaapput:

• Erngup nukinganik nukissiuuteqarnerulernissaq
• Seqernup anorillu nukinganik ineriartortitsinissaq
• Najukkani nioqqutissiornerup pingaartinneqarnera
• Atoqqiinissap pisariillisarnissaa
• Atisanik paarlaasseqatigiillutalu atoqqiisa
• Bussit biilillu innaallagissamik ingerlasut amerlanerit
• Eqqagassat iginneqarneri pisariillisarnissaat pinngortitamut pinnginniassammata
• Eqqakkat immikkoortitertigit akisussaassuseqartumillu ikuallallugit
• Ikuallaanermi kiak aniasup atoqqinnissaa
• Nerisassanik maangaannartitsineq unitsilli

”Kalaallit Nunaat Parisimi isumaqatigiissutaanut ilanngunneranut atatillugu uagutsinnut neriuutinik tunisivoq, Niklas oqaaseqarnermini oqaatigaa, tassanilu ilaatigut FN-imi silap pissusia pillugu pisortaq Simon Stiell, Nunalerinermut, Imminut pilersornermut, Nukissiuutinut avatangiisinullu Naalakkersuisoq, Kalistat Lund, aammalu ineriartortitsinermut nunarsuarmilu silap pissusia pillugu politikkimut ministeri, Dan Jørgensen tusarnaartuupput.

UNICEF-ip nuannaarutigaa Naalakkersuisut pisumi pingaaruteqartumi oqaaseqartitsinissamut meeqqanik aggersaammata:

”Kalaallit Nunaat maanna isumaqatigiissummut meeqqanut inuusuttunullu isumalerujussuarmut isumaqatigiissummi peqataalernera pisuuvoq pingaarutilerujussuusoq. Taamaammat nuannerpoq Meeqqat pillugit isumaqatigiissummi artikel 12 malillugu meeqqat isummaminnik annissinissaat toqqarneqarsimammat. Maanna pingaaruteqarpoq inersimasutut tusarnaarnissaput isumaasalu pimoorunnissaat,” UNICEF Kalaallit Nunaanni suliniummi pisortaasoq, Tina Dam oqarpoq.

”Qujanaq tusarnaarassi – maanna iliuuseqassaagut – Kikkulluunniit iliuuseqaqataasinnaapput,” Niklasip oqaaseqarnini naggasserpaa.