Ikinngutigiit pitsaasut” pillugit arpatsitsineq

Qassinik ukioqarneq, kulturit, sumiuussuseq, upperisaq allalluunniit apeqqutaajunnaartarput inuit nuannarillutik ikinngutigiilerneranni. Ukiormanna Meeqqat ulluat nalliussillugu nunatsinni meeqqat atuarfii 30-t sinnerlugit arpatsitsissapput qulequtalimmik “Ikinngutitsialaat”.

NAKUUSA-p UNICEF-illu nunatsinni tamanut sammitikkusuppaat qanoq pingaartigisoq ikinnguteqarneq. Meeqqat pineqartillugit assut pingaaruteqarpoq inoqatinut kikkunnullunniit attaveqarluarnissaq. Meeqqap peroriartorneranut anersaakkullu ineriartorneranullu pingaarutilerujussuuvoq kammalaateqarlunilu ikinnguteqarnissaa.

Taamaattumik NAKUUSA-p UNICEF-illu kikkulluunniit tamaasa kajumissaarusuppaat Meeqqat ulluat, pingasunngorneq 1. juuni eqqorlugu Ikinngutigiit pitsaasut pillugit arpaqataaqqullugit. Massakkuugallartoq nunatsinni meeqqat atuarfii 30-t sinnillit peqataaniarlutik nalunaareerput. Soqutiginnittoqaqaaq, ullullu tamaasa peqataarusullutik nalunaartartut amerliartorput. Kommunini amerlanerni aalajangersimavaat arpatsitsinissarput meeqqat ulluanni aaqqissuussinerit ilagissagaat.

Meeqqat inersimasullu kajumissaarusuppavut aaqqissuussinernut sumiffinni ingerlanneqartussanut sapinngisamik tapersersueqqullugit.

Peqatigiissinnaatitaaneq

Meeqqat inoqatiminnut attaveqalersarput meeraqatitik inersimasullu peqatigalugit. Allanik peqateqarnermikkut meeqqat paasiartuaalersarpaat inoqatinut sunniisinnaaneq qanilaarsinnaanerlu suunersut. Allat peqatigineranni meeqqat misigittarsinnaaneq ineriartortilersarpaat, piginnaaneq inooqatigiinnikkut siuariartornissaannut tunngaviulluinnartoq. Pinnguarnikkut meeqqat peqatigiillutik inuttut piginnaasatik ineriartortilersarpaat.

UNICEF-ip nunatsinni pisortaata Maliina Abelsenip malugeqquaa tamatta pisinnaatitaaffeqartugut arlaannut sumulluunniit akuunissatsinnut, aamma pisussaaffeqartugut inoqatitta peqatigiinnitsinnut ilanngutsittarnissaannut.

“Nalunngilarput inoqatinik peqateqarnissaq pitsaasumik inuuneqarnissatsinnut qanoq pingaartigisoq. Ajoraluartumillu meeraqarpoq inuusuttoqarlunilu kiserliortunik, immikkoortitaasunik pimmatigineqartartunillu. Taamaattoqartarnera akuerineqarsinnaanngilaq. Taamaattumik meeqqat ulluanni sammitikkusuppavut tamatta peqatigiissinnaanerput tamattalu inissaqarnerput”.

Unammisitsineq
Arpatsitsinermut atasumik atuaqatigiikkuutaat peqataasut ajugaassagunik atuaqatigiillutik festernissaminnut eqquisinnaapput 2.500 koruuninik. Ajuugaatinneqassapput atuaqatigiit torrannerpaamik “Ikinngutigiit pitsaasut” qulequtaralugu assilisaminnik uunga nassiussisut info@nakuusa.gl.

Betoncentralen Meeqqat Ulluanni aningaasaliisuuvoq suleqatigalugit NAKUUSA aamma UNICEF.

”Betoncentralenip tulluusimaarutigaa Meeqqat Ulluat tapersersorsinnaagamiuk. UNICEF-ip aamma NAKUUSA-p meeqqat inuusuttullu pillugit sulinerat angisooq inuiaqatigiinnilu sanngiinnerusunik iluaqusiisussaq pillugu suliniutit tapersersortuarumavagut. Meeqqat Ulluat aqqutigalugu meeqqat inuusuttullu akornanni ataatsimoorneq, peqatigiinneq ikinngutitaartornerillu pilersinneqartarput, Kalaallit Nunaat tamakkerlugu. Nuannaarutigaarput suliniutit taamaattut Betoncentralenimit aningaasalersorsinnaagatsigit” Betoncentralenip pisortaa oqarpoq.

NAKUUSA aamma UNICEF pillugit

• NAKUUSA tassaavoq UNICEF Danmarkip Naalakkersuisullu suleqatigiissutaat.
• NAKUUSA 2010-mili pilersinneraqarami meeqqat inuiaqatigiinni oqallinnernut akuunerulerlutillu sunniuteqarnerulernissaat anguniarlugit sulissutiginnippoq.
• NAKUUSA-p Meeqqat Isummersorfii kommunini tamani pilersippai immikkut aamma Kangia Avanersuarlu ilaasortaatitaqarlutik. Ilaasortat meeqqat atugaannik pisinnaatitaaffiinilli nukittorsaaniarlutik najukkaminni sulissuteqarput.
• Sinerissami meeqqat atuarfiini 26-ni Nakuusaaqqat ingerlapput. Taakku sulipput FN-ip Meeqqat pillugit isumaqatigiissutaani allassimasut malillugit, siunertaralugu meeqqat inuusuttullu atuarfimminni pitsaasumik nuannersumillu ingerlanissaat.

Paasissutissanik amerlanerusunik pissarsiffigisinnaavarsi: Sille W. Nielsen, mail: swnielsen@unicef.dk, telefonnr. +299 242733