Kalaallit nunaat tamakkerlugu meeqqat
silap pissusianut iliuuseqarput

Meeqqat NAKUUSAp Meeqqat Isummersorfiinit arfineq marluneersut ullumikkut piffinni assigiinngitsuni ukiumoortumik Meeqqat Ataatsimeersuarneranni naapipput. Tassanni silap pissusianut unammilligassaq najukkaminniittut oqaluuseraat.

Oktobarip qaammataanili inuusuttut nuna tamakkerlugu silap pissusiata unammilligassartai najukkaminni misissorpaat.

Ullumikkut NAKUUSAp 2022-mi meeqqanut ataatsimeersuartitsineranni nittartakkatigut naapipput tassanilu misilittakkatik oqaluuseralugillu Naalakkersuisunut, borgmesterinut inersimasunullu allanut innersuussutiliatik oqalugiaatinngortillugit katersorlugit.

”Meeqqat ataatsimeersuarnerat, nunatsinni silap pissusia pillugu isummaminnik oqariartuuteqarsinnaanerannut sinaakkusiisinnaanerput tulluusimaarutigeqaarput. Maanna nunatsinni politikerinut kajumissaarivugut meeqqat 18. januar ataatsimoorlutik oqalugiarnissaannut tusarnaaqqullugit,” UNICEF Kalaallit Nunaanni suliniutinut pisortaq, Maliina Abelsen, oqarpoq.

Meeqqat siullermeerlutik ataatsimoorlutik tamarmk immikkut kommuniminnit oqalugiassapput 18. januar – kingusinnerusukkullu aamma Naalakkersuisunut.