Meeqqat ataatsimeersuarneranit silap pissusianut oqariartuut:

Silap pissusiata allanngoriartornera tamatta akisussaaffigaarput

”Silap pissusianut tunngasunik paasisaqarpugut, allanngueqataavugut meeqqallu Kalaallit Nunaanni pitsaanerusumik siunissaqarnissaa qulakkeerlugu”, Aviana Lennert 16-nik ukiulik oqarpoq.

Naalakkersuisut erngup, seqerngup anorillu nukinganik piujuartitsisunut atuineq tamakkiisumik pingaartittariaqarpaat, najukkani nioqqutissiat pingaartinneqarnerusariaqarput Kalaallillu Nunaanni najugallit tamarmik atuinertik eqqarsaatigisariaqarpaat.

”Innersuussutigaarput nioqqutissiat najukkani suliaasartut atornerunissaat, illunilu erngup nukinganik kiassagaasuni naatitsivinni naatitsisoqarnerusassasoq. Taamaalilluni naatitanik Kalaallit Nunaannut assartuinermi CO2-mik aniatitsineq annikillissagaluarpoq”, Nina Clasen 15-nik ukiulik oqarpoq.
”Aamma innersuussutigaarput meeqqanut inuusuttunullu atisanik atoqqiisarnissaq kingornussisarnissarlu, taamalillutik atisat sivisunerusumik atorneqarsinnaaniassammata atuipilunnerlu annikillissalluni”, Irene Olsen 15-nik ukiullip, nangippaa.

Taakkuupput Ilulissani sapaatiummat ataasinngormallu ukiumoortumik Meeqqat Ataatsimeersuarnerani meeqqat 23-usut innersuussutaasa ilaat. Meeqqat Ataatsimeersuarnerat NAKUUSAmit aaqqissuunneqarpoq – tassaallunilu Naalakkersuisut UNICEFillu suleqatigiissutigisaat.

Ullut marluk ingerlanerini meeqqat isummersorfiini ilaasortat oqallipput, ilaatigut Ilinniartitaanermut Aqutsisoqarfimmi atuarfinnut siunnersortimit, Ane Fleischerimit, silap pissusiata allanngoriartorneranut tunngasunik ilisimatinneqareerlutik. Nukinik piujuartitsisunik misileraapput, qanorlu iliorluni CO2-mik aniatitsineq annikillisarneqarsinnaanersoq oqallisigaat, Kangiatalu Illorsuanut pulaarlutik. Ullut taakku ingerlanerini aamma pitsaasumik oqaloqateqariaatsinut tunngasumik isumassarsiortinneqarput, tassani danskit peqatigiiffiannit, Brobyggerne-mi siulittaasumit, Özlem Cekicimit, saqqummiiffigineqaramik.

Meeqqat ataatsimeersuarneranni Meeqqanut, Inuusuttunut Ilaqutariinnullu Naalakkersuisoq, Paneeraq Olsen, aamma peqataavoq.

”Meeqqanut, Inuusuttunut Ilaqutariinnullu Naalakkersuisutut tusarnaarnissarsi uannut pingaaruteqaqaaq, qilanaarpungalu ataatsimeersuarnissinnit innersuussutisi tigunissaanut. Kalaallit Nunaanni meeqqat inuusuttullu siunissaa pitsaasuussappat oqariartuutisi pingaaruteqartorujussuupput. Nunatsinni najugarisatsinni silap pissusiata allanngoriartornera malugilereerparput, taamaalillutalu pinngortitarsuatta kusanartorsuup kulturittalu paarinissaa eqqarsaatigisariaqarlugu, allanngoriartornermi suli ersarinnerulertussaassaaq. Tassunga iluaqutaasinnaavutit! Siunissamik piujuartitsisumik eqqartuinissamut aalajangeeqataasinnaavutit, meeqqammi inuusuttullu oqariartuutaat isumassarsiaallu tusarneqassammata iliuuseqarfigineqassallutillu,” Paneeraq Olsen oqarpoq.

Borgmesterit meeqqallu oqaaseqartartuat, Aviâja Egede Lynge, isumaqatigiillutik oqarput meeqqat inuusuttullu oqariartuutaat pingaaruteqartut, taamaammallu meeqqat isummersorfii nunatsinni meeqqat inuusuttullu sinnerlugit immikkut ittumik akisussaaffeqartut.

”Torrageqaassi. Meeqqat ataatsimeersuarnerani peqataavusi meeqqat allat sinnerlugit. Sinnerlugit oqariartuuteqarpusi”, Borgmesteri Malik Berthelsen, inuusuttunut oqarpoq.

”Meeqqat ataatsimeersuarneranni sammisat pingaarutillit marluk oqallisigineqarput, taakkulu tamarmik meeqqat pisinnaatitaaffiinut siunissaannullu tunngasuupput; Silap pissusiata allanngoriartornera aammalu qanoq isumaqatigiinngikkaluarluta oqaloqatigiissinnaanersugut”, Aviâja Egede Lynge erseqqissaavoq.

Meeqqat Isummersorfiisa silap pissusiata allanngoriartorneranut piujuaannartitsinissamillu suliaqarnerini Meeqqanut, Inuusuttunut Ilaqutariinnullu Naalakkersuisoq, borgmesterit qaffasissumillu atorfillit allat UNICEFimi suliniutinut pisortaq, Maliina Abelsen, peqatigalugu ataatsimoorput. Tassani NAKUUSAp aaqqissuussaanera nutaaq NAKUUSAp kommunillu suleqatigiinnermut isumaqatigiissutaat nutaat pillugit oqaloqatigiipput.

”Meeqqat inuusuttullu oqariartuutaasa naalaarnissaat pingaaruteqarpoq, taamaammallu NAKUUSAp meeqqanut ataatsimeersusartitsinera pingaarpoq. Demokratiskiusumik pissuserinneq piginnaanertussuseeqataavoq isummanillu annissisinnaanermut sapiillisaaqataalluni. Meeqqat meeqqanut tunngatillugit tusaanissaat qulakkiissavarput. Meeqqat Isummersorfii atuarfinnilu Nakuusaaqqat (pisinnaatitaaffilerisartut) meeqqat oqariartuuteqarsinnaanerannik periarfissiissaaq. Taakkulu ingerlannissaannut kommuninit atuarfinnillu nukinnik atuinissamik pisariaqarput. Taamaammat siunissami NAKUUSAmi kommuninilu suleqatigiissinnaaneq pillugu borgmesterinik atorfilinnillu oqaloqatigiinneq pitsaasoq nuannaarutigaarput, Maliina Abelsen oqaluttuarpoq.

Aamma ataasinngorneq ualikkut NAKUUSA Özlem Cekic-ip oqalugiarneranut ”Tak for kaffe”-mut, Ilulissani Hotel Arcticimi qaaqqusivoq. Oqalugiarneq isumaqatigiinngikkaluarluta qanoq ililluta pitsaasumik oqaloqatigiissinnaanermut tunngasuuvoq, tamannalu aamma tusarnaariarneqarsinnaavoq GUX Nuummi pingasunngorneq aprilip 6.-ani nal. 19.

 

Meeqqat ataatsimeersuarnerat pillugu:

  • Ilulissani sapaat 3. apriilimiit ataatsinngorneq 4. apriilimut meeqqat ataatsimeersuarnerannut meeqqat 23-t peqataapput. Ukioq manna sammisaq tassaavoq silap pissusiata allanngoriartornera.
  • Meeqqat ataatsimeersuarnerat NAKUUSAmit aaqqissorneqartoq – Naalakkersuisut UNICEF Danamarkillu suleqatigiissutigaat, siunertaallunilu meeqqat pitsaanerusumik atugaqalernissaat pisinnaatitaaffeqalernissaat.
  • Meeqqat ataatsimeersuarnerat ukiumoortumik pisarpoq, siullermeerlunilu 2011-mi ingerlanneqarluni.