Meeqqat ataatsimeersuartut silap pissusiata allanngoriartornera
pillugu inassutaat Naalakkersuisut Borgmesterillu tiguaat
NAKUUSA-mi Meeqqat Isummersorfiisa ullumikkut silap pissusiata allanngoriartornera piujuartitsinerlu pillugit aalajangersagartik nunatsinni borgmesterinut naalakkersuisunullu tunniuppaat. Aalajangersagaq suliarineqarpoq apriilimi Meeqqat Ataatsimeersuarneranni oqartussanullu innersuutit ilagaat piujuartunik nukissiuuteqarnerulernissaq pimoorunneqarnissa.
Silap pissusiata piujuartitsinerlu pillugit aalajangersagaq ullumikkut meeqqanit kommunit borgmesteriinut tamanut aamma Meeqqanut, Inuusuttunut Ilaqutariinnullu Naalakkersuisunngorlaamut Mimi Karlsenimut tunniunneqarput.
Aalajangersagaq siunissami minguitsunik avatangiiseqarnissaq qulakkeerumallugu innersuutaapput, NAKUUSA-mi Meeqqat Isummersorfiisa (MI) apriilimi ukiumoortumik ataatsimeersuarnerminni isumaqatigiissutigisaat. Meeqqat Isummersorfiini ilaasortatut 20-it sinnerlugit peqataaffigisaanni silap pissusiata allanngoriartorneranut tunngasunik ilinniartinneqarlutillu oqalliseqarput. Ataatsimiinneq NAKUUSA-mit aaqqissuunneqarlunilu ingerlanneqarpoq.
“Isumaqarpugut pingaartuusoq silap pissusiata allanngoriartornerani uagut meeqqat inuusuttullu siunissami avatangiisitsinnut kinguaassatsinnullu sunniuteqartussat pillugit tusarniarneqartarnissarput. Oqallinnermi tusarniarneqarlutalu akuutinneqarumavugut, taamaaliornikkut qulakkeerinneqataaffigerusukkatsigu qanoq iliuuseqartoqarnissaa. Aalajangersagaq taanna atorlugu tamassinnut oqarumavugut – KIKKULLUUNNIIT sunniuteqaqataasinnaapput!” Ilaatigut taama Meeqqat Isummersorfii aalajangersakkaminni allapput.
Meeqqat Isummersorfiisa kalaallit politikeriinut innersuutigaat piujuartunik imermik, seqinermik anorimillu nukissiuuteqarneq inerisaavigineqassasut, taamaaliornikkut silap pissusiata allanngoriartornera kigaallisikkumallugu. Innersuuteqaataasa arfiniliusut ilagaat nunaqqatitik kajumissaaramikkit nioqqutissiat allallu nunatsinneersut pingaarnerutittassagaat aammalu atoqqiinissamut periarfissat pitsanngorsaavigineqassasut.
“Tulluusimaarutigaara meeqqat innersuussutaat Naalakkersuisuni sulinitsinnut pingaaruteqartut tigusinnaagakkit”, Meeqqanut, Inuusuttunut Ilaqutariinnullu Naalakkersuisoq Mimi Karlsen oqarpoq.
Erseqqissaavorlu: “Nuna inuuffigisarput nunarsuatta kissakkiartornerata malunnartumik sunnerpaa, pisariaqartippavullu kikkulluunniit ilungersorlutik eqqarsaqataanissaat qanoq iliorluta aaqqiissutaasinnaasunik piujuartunik nassaarniarnernitsinni – meeraappata utoqqaappatalu assigiimmik. Meeqqat Isummmersoqatigiit tunniusimallutik isumassarsianik pitsaasunik aalajangersaanermikkut sulinermikkullu siunissamut neriulersippaatigut.”
UNICEF sinnerlugu nunatsinni akisussaasoq Maliina Abelsen nuannaarpoq Naalakkersuisut nunatsinnilu borgmesterit meeqqat oqariartuutaannik tigusilluarmata.
“Pingaaruteqarluinnarpoq meeqqat isummersuutaannut inuiaqatigiit tusarnaartarnissaat. Pingaartumik silap pissusiata allanngoriartornera pineqartillugu meerarpassuit siunissaminni tamatuma kingunissai pillugit ernumapput. Meeqqat ataatsimeersuarneranni ersersippaat meeqqat uummammioqarlutik, uagullu UNICEF sinnerlugu qularinngilarput innersuuteqaataat pitsaanerusumut allannguiniarnermi iluaqutaajumaartut,” Maliina Abelsen oqarpoq.
Aalajangersagaq meeqqallu ataatsimeersuarnerat pillugu:
- Meeqqat Isummersorfiisa aalajangersagaat NAKUUSA-p Ilulissani sapaammi 3. aamma ataasinngornermi 4. apriili meeqqanik ataatsimeersuarneranni suliarineqarpoq. Aalajangersakkami saaffigineqarput politikerit, aalajangiisartullu allat, nunaqqatit, suliffeqarfiit kiisalu meeqqat inuusuttullu.
- Meeqqat Ataatsimeersuarnerannut takkullutik peqataapput 21-t, anngutinngitsoortullu qarasaasiakkut peqataallutik. Ukiup qulequtaatut eqqartorpaat silap pissusiata allanngoriartornera piujuartitsinerlu.
- Meeqqat Ataatsimeersuarnerat NAKUUSA-p aaqqissuuppaa – Naalakkersuisut UNICEF Danmarkillu meeqqat atugaannik pisinnaatitaaffiinillu pitsanngorsaaniarnerminni suleqatigiiffiat.
- Meeqqat Ataatsimeersuarnerat – ukiut tamaasa pisartoq – siullermik ingerlanneqarpoq 2011-mi.