Kunngikkormiutut Ataqqinassusilik Kunngissap nulia
UNICEF Danmarkip Kalaallit Nunaanni Allaffimmi pulaarpoq

 Kunngikkormiutut Ataqqinaassusilik Kunngissap nulia pingasunngornermi UNICEF Danmarkip Kalaallit Nunaanni Allaffimmi pulaarpoq. Kunngissap nuliata pulaarnermini UNICEF-ip Kalaallit Nunaanni meeqqat pisinnaatitaaffiinik meeqqallu inuunerinnissaannik suliniutai paasisaqarfigai.   

Kunngikkormiutut Ataqqinassusillip Kunngissap nuliata Kalaallit Nunaanni meeqqat amerlanerusut toqqissisimanartumik naleqartinneqarlutillu perornissaannut suliniutit paasisaqarfiginerulaarpai. Tamanna pivoq, UNICEF Danmarkip Kalaallit Nunaata Allaffiani pulaarnermini, tassani suliffeqarfiup meeqqat pisinnaasaannik qaammarsaanermi aamma Naalagaaffiit Peqatigiit Meeqqat Pisinnaatitaaffii Pillugit Isumaqatigiissutip ilisimaneqarnerata siammarternissaanut suliniutit paasisaqarfigalugit. 

UNICEF Danmark-ip generalsekretær-iata Susanne Dahl-ip Kunngikkormiutut Ataqqinassusillip Kunngissap nuliata pulaarnera naleqartippaa

”Kunngissap nuliata suliamut pimoorussinera meeqqat inuunerinnissaanik meeqqallu pisinnaatitaaffiinik nukittorsaanissamut pingaaruteqangaatsiarpoq. Kalaallit Nunaanni meeqqanut takutitsivoq meeqqat inuunerat oqartussaanerallu pingaaruteqartut. Kunngissap nulianut malinnaasup kialuunniit qularissanngilaa, Kunngissap nulia meeqqat inuunerinnissaannik ataatsimoorfinniillu immikkoortitaannginnissaannik suliaqarnissamut uummateqartuusoq. Suliassaq taanna UNICEF Danmarkip – Kalaallit Nunaanni Allaffimmi aamma – assigiissutigaarput,” Susanne Dahl oqarpoq.   

Sumiginnaaneq unitsissaaq, inuiaqatigiinnilu meeqqat nipaat nukittorsarneqassaaq.  

UNICEF Danmarkip Kalaallit Nunaanni Allaffiani Pisortaq, Maliina Abelsen, Kunngissap nuliata soqutiginninneranut tulluuppoq. UNICEF 2011-mili Kalaallit Nunaanni suliniuteqalerpoq, piffissamilu tassani kalaallit meerartaasa meeqqat pisinnaatitaaffiinut ilisimasaat qaffapput, Maliinap oqaatigaa:  

”Tamanna pitsaavoq, tassami meeqqat pisinnaatitaaffimminnik ilisimasaqarangaamik nukittunerulersarput, ilaatigullu kanngutsaatsuliorfigineqarnissamut killiliinissamik taavalu nammineq meeraqatitillu pisinnaatitaaffiinik illersuinissamik sakkussaqalersaramik. Kisianni suliassat suli annertupput, tassami siuariartortoqaraluartoq, Kalaallit Nunaanni meerarpassuit suli atugarliorput sumiginnagaallutillu. Tamanna unitsissavarput. Taassuma saniatigut meeqqat nukittorsassavagut – assersuutigalugu inuiaqatigiinni peqataatinneqarnerisigut oqartussaaqataanerisigullu.”  

Kalaallit Nunaanni inuiaqatigiinnik misissuinerup kingulliup takutippaa, 1995-ip kingorna inunngortunit meeqqat pingajorarterutai sinnerlugit angerlarsimaffimmi imigassamik ajornartorsiuteqarfiusumi peroriartortut, ukioqatigiiaanilu taakkunani meeqqat tallimaagaangata ataaseq meeraanermini kinguaassiutitigut kanngutsaatsuliorfigitittarsimasoq.1 Misissuineri allat takutippaat inuusuttut akornanni kiserliorneq imminullu toqunnissamik eqqarsaateqarneq atugaasoq.2  

"Kunngissap nuliata suliamut pimoorussinera meeqqat inuunerinnissaanik meeqqallu pisinnaatitaaffiinik nukittorsaanissamut pingaaruteqangaatsiarpoq. Kalaallit Nunaanni meeqqanut takutitsivoq meeqqat inuunerat oqartussaanerallu pingaaruteqartut."
UNICEF Danmark-ip generalsekretær-iata Susanne Dahl-ip

Kunngissap Nuliata UNICEF-mi pulaarnermini suliffeqarfiup pitsaasumik allanngoriartortitsinissamik suliaanut ilisaritinneqarpoq. Ilaatigut NAKUUSA ilisaritinneqarpoq – Namminersorlutik Oqartussat suleqatigineratigut Meeqqat Isummersorfii aqqutigalugit meeqqanik peqataatitsinermik suliniutilik, taakkualu paasisitsiniutinik meeqqanik inersimasunillu meeqqat toqqissisimasumik peroriartornissaanut pitsaasumik sinaakkuteqarnissaannik isumassarsisitsisinnaasunik suliniuteqartarlutik.  

UNICEF-ip allaffiani Kunngissap Nuliata UNICEF-ip Kalaallit Nunaata meerartaannik amerlanerusunik timimikkut aalatitsinerunissaanut taavalu timersornermi ataatsimoorfinnut toqqissisimanartumik peqataatitsinermillu periuseqartunut peqataanermikkut tarnikkut nukittuujunissaannut suliniutaat aamma paasisaqarfigaa. Suliniut Timersoqatigiit Kattuffiat (GIF), Namminersorlutik Oqartussat isumaginninnikkut immikkoortortaqarfiup pinaveersaartitsinermik suliniuteqarfia Paarisa, niuertoruseqarfik KNI, Kalaallit Nunaanni Politiit, aammalu Innuttaasut Peqqissusianik Ilisimatusarfik suleqatigalugit ingerlanneqarpoq.  

Kunngissap Nulia UNICEF-mut pulaarnera sioqqullugu Kunngissap Nulia Nutaaliorfimmi UNLEASH-mi pulaarpoq, tassani inuusuttut issittormiunik 200-nit amerlanerusunit kateritsinneqarput – taakkunanilu peqataallutik inuusuttut UNICEF-ip suliniutaaneersut tallimat – taakkua piujuartitsinermik aallaavilimmik aaqqiissutissanik suliaqassallutik. Kalaallit Nunaannut angalaneq Mary Fonden aqqutigalugu pivoq.    

 

PAASISSUTISSAT: UNICEF DANMARK KALAALLIT NUNAANNI   

  • UNICEF tassaavoq Naalagaaffiit Peqatigiit aqqutigalugit nunani siuttuulluni meeqqat inuunermi aniguinissaannik inuunerinnissaannillu suliniuteqartoq. UNICEF Danmark suliniummut aningaasaliisussarsiortarpoq, Danmarkimi Kalaallit Nunaannilu meeqqat pisinnaatitaaffiisa ilisimaneqarnerunissaat anguniagaralugu.
      
  • UNICEF Danmark 2011-mili Kalaallit Nunaanni suliniuteqalerpoq, 2019-miillu Nuummi allaffeqarluni.
      
  • Kalaallit Nunaanni meeqqat atugarisaata pisinnaatitaaffiisalu suliniuteqarfigineri arlalitsigut pivoq. Ilaatigut ’NAKUUSA’, Namminersorlutik Oqartussat suleqatigalugit ingerlanneqartoq, aqqutigalugu paasisitsiniutinik meeqqanillu peqataatitsinissamik suliniuteqarluni, ’Ataatsimoorluta Aalasa’, meeqqat amerlanerusut timersornermi ataatsimoorfinni toqqissisimanissaannik peqataatinneqarnissaannillu suliniuteqarluni, taavalu Atuarfiit Pisinnaatitaaffinnik Tunngavillit siammarterneqarnissaat, tassani meeqqat sukumiisumik pisinnaatitaaffimminnik suliaqartarlutik
      
  • UNICEF Danmarkip Kalaallit Nunaanni suliai pillugit uani paasisaqarnerugit: https://www.unicef.dk/groenland/