Meeqqat NAKUUSA-meersut aaqqiissutissanik
nassaarniassapput nunat avannarliit piujuartitsineq pillugu ataatsimeersuarneranni

NAKUUSA-mi Meeqqat Isummersorfianeersut nunanit avannarlerneersut inuusuttullu allat 200-t peqatigalugit nutaaliornikkut aaqqiissutissanik nassaarniaqatigiissapput UNLEASH-ip aaqqissugaanik, Nuummi arfininngorpat aallartittussamik. UNICEF-ip UNLEASH-illu suleqatigiinnerat aqqutigalugu meeqqat inuusuttullu najukkaminni aporfinnik aaqqiiniaqataanissaat aammalu aaqqiissutissanik piujuarsinnaasunik nassaarniarnermut tunngavoq, FN-ip nunarsuarmiunut anguniaqqusaanut naapertuuttumik.

 

Meeqqat tallimat NAKUUSA-mi Meeqqat Isummersorfianeersut ullut arlaqanngitsut qaangiuppata peqataassapput piujuartitsinissaq siunertaralugu nunatsinni suliniutit annerpaat ilaannut. Peqataaffigisassaat tassaavoq UNLEASH, nunarsuaq tamakkerlugu iluanaarniutaanngitsumik suliniut Nuummi ingerlanneqartussaq ulluni 20. – 26. aggusti. Nunanit avannarlerneersut allat 200-t 18-35-nik ukiullit peqatigalugit FN-ip nunarsuarmiunut anguniaqqusaanut naapertuuttunik najukkani aporfinnik iluarsiiniarnernut tunngasunik suliaqarnissaminnut piareersassapput.

 

Meeqqat Isummersorfianeersut peqataasussat tamarmik 15-18-inik ukioqarput. Taakku UNICEF-ip Naalakkersuisullu suleqatigiissutigisaanut NAKUUSA-mut tamarmik atapput, siunertaralugu meeqqat inuiaqatigiinnut akuutinneqarnerullutillu pisinnaatitaaffiisa nukittorsarneqarnissaat. Meeqqat Isummersorfii ukiumut ataasiarlutik ataatsimeersuartarput, ataavartumillu najukkaminni siunnersuisoqatigiinni naapittarnermikkut meeqqat sunniuteqarnerunissaat isummersueqataanissaallu anguniartarlugu.

"Aaqqiissutissanik nutaanik pilersitsiniarnissaq pissangageqaara sunniuteqarumaassanersoq"
Majli, 15-inik

Majli 15-inik ukiulik Meeqqat Isummersorfianeersoq Nuummi suliniuteqaqataanissaminut qilanaarpoq. Tassaniinnerminni aamma Kunngikkormiutut Ataqqinassusilimmit Kunngissap nulianit Marymit tikeraarneqassapput:

”UNLEASH-imut peqataarusuppunga aallanngueqataarusukkama, suleriuserlu nuannerunartillugu. Neriuutigaara UNLEASH-ip suleriaasia pissarsiaqarfigilluarumaarlugu. Aaqqiissutissanik nutaanik pilersitsiniarnissaq pissangageqaara sunniuteqarumaassanersoq. Qilanaarinerpaavarali Kunngissap nuliata Maryp naapinnissaa”, illarluni oqarpoq.

UNICEF Danmarkip Kalaallit Nunaanni immikkoortortaani suliniutinut pisortaa Maliina Abelsen ilassuteqarluni oqarpoq:

”UNLEASH aqqutigalugu takutinneqarpoq inuusuttortavut nassaarsiullaqqissuseqartut suliaqarusussuseqarlutillu, qilanaaraarpullu meeqqat isummersorfianeersut angajulliunerumaanit pikkorissunit peqateqarlutik piginnaassutsiminnik takutitsinissaat. Ataatsimiinneruttaaq malitsigeriaannaavaa ungasinnerusoq eqqarsaatigalugu nunatsinni inuiaqatigiit ineriartornerannut meeqqat sunniuteqarnerulernissaannut iluaqutaassasoq, uagummi UNICEF-imi sulisut UNLEASH-ip suleriaasia malillugu nutaaliornissamut ilinniarsimavugut. Periaaseq taannaassaaq siunissami suliassatsinnik aaqqissuileraangata isumassarsiorfigisassarput, soorlu ukiumoortunik meeqqat ataatsimeersuarnerini.”

Siullerpaamik meeqqat ilagalugit aaqqissuussisoqassaaq

Nutaaliornikkut suleriaaseq Københavnimi aallarnerneqarmalli Kalaallit Nunaat sisamassaa ingerlatseqataassaaq, UNLEASH-ip aqutaanik. Kisianni siullerpaamik meeqqanik peqataatitsilluni ingerlatsisoqassaaq.

”2017-imiilli inuusuttut 18-it sinnerlugit ukiullit 5.000 sinnillit UNLEASH-imut peqataasimapput. Taamaattumik tulluusimaarnaqaagut nutaaliorluni aallarnisaanermut periuserput perngaammik 18-it inorlugit ukiulinnit peqataaffigineqarnialermat. UNLEASH tassaavoq FN-ip nunarsuamiunut anguniaqqusai pillugit sulissuteqarnermi toqqammaviit pingaarnerit ilaat, suleqatigiinnikkut nutaaliorluni nunarsuarmi ajornartorsiutinik pingaarnernik aaqqiiniarluni piujuarsinnaasunik iluarsiiniaqataajumalluni. Tupinnaannarporlu maannakkut inuusuttuaqqat UNLEASH-ip periusaanik atuinermikkut nunarsuarmi nunagisaminnilu Kalaallit Nunaanni sunniuteqaqataasinnaalermata.” Taama oqarpoq UNLEASH-imi siulersuisut siulittaasuat professor Flemming Besenbacher.

”UNLEASH aqqutigalugu takutinneqarpoq inuusuttortavut nassaarsiullaqqissuseqartut suliaqarusussuseqarlutillu, qilanaaraarpullu meeqqat isummersorfianeersut angajulliunerumaanit pikkorissunit peqateqarlutik piginnaassutsiminnik takutitsinissaat"
UNICEF Danmarkip Kalaallit Nunaanni immikkoortortaani suliniutinut pisortaa, Maliina Abelsen

Siullerpaamissaaq UNLEASH aqqutigalugu suliniutini nunarsuup ilaannaani aporfiit sammineqarniarput. Meeqqat inuusuttullu immikkut sammissavaat Issittumi Avannarlermi aporfiit ajornartorsiutillu qiteritillugit iluarsiiniarluni isumassarsiorneq suliarineqassammat. Avannaarsuani silap pissusaata allanut naleqqiulluni malunnarnermik kissakkiartorpoq, taamaattoqarneranullu aaqqiissutissanut isumassarsioqatigiittoqassaaq. Inuit avinngarusimallutik ikittukkuutaarlutik inuuffigisaanni timikkut tarnikkullu peqqinnikkut pitsanngorsaaniarluni periarfissat misissussavaat. Ilanngulluguttaaq avinngarusimagaluarluni ilinniartitaanikkut pitsaasumik angusaqarsinnaaneq qanoq aqqutissiorneqarsinnaanersoq iluarsiissutissarsiussavaat.

 

UNLEASH Kalaallit Nunaanni annertuumik tapersersoqarpoq Naalakkersuisuniit, kommuninit arlariinnit, kattuffinnit, aningaasaateqarfinnit suliffeqarfinnillu 50-it sinnilinnit.

 

 

FAKTA: UNLEASH

  • 2017-imi UNLEASH Københavnimi aallarnerneqarmat inuusuttut piukkunnaatillit 5.000 sinnillit nunani 167-ineersut aaqqiissutissanik tigussaasunik 750-inik piujuarsinnaasunik FN-ip nunarsuarmiunut anguniaqqusaanut naapertuuttunik inigaqarsimapput.
  • Iluarsiissutisat ilaat 200-t sinnillit piukkunnaatilinnit ingerlateqqinneqarlutik UNLEASH-imik suliassaqarfiit allanut ingerlateqqinneqarsimapput, ilaallu 120-t aningaasaliiffigineqarsimallutik.
  • UNLEASH-ip aqqutissiuutaanut assersuutissaqqilluarpoq OneDay Health. Tassunga tunuliaqutaavoq Ugandami peqqinnissaqarfinnut periarfissat amigarpallaarneri, taamaattumillu najukkani ataasiakkaani peqqinnissakkut sullissivinnik aningaasalersugaanikkut imminnut napatittunik pilersitsiortortoqarpoq. Ullumikkut Uganda OneDay Health aqqutigalugu peqqinnissakkut sullissiviit 27 ammarneqarsimalerput, maannamullu napparsimasunik 100.000 sinnilinnik katsorsagaqareerlutik. Peqqinnissakkut sullissivik ataaseq akeqarpoq $4.000, inunnillu 10.000-inik sullissisinnaalluni.

 

FAKTA: UNICEF DANMARK KALAALLIT NUNAANNI

  • UNICEF suliniaqatigiiffiuvoq nunarsuaq tamakkerlugu FN sinnerlugu meeqqat inuuniarnikkut atugaannik sorsuuteqartoq. UNICEF Danmark aningaasanik katersuiniartarpoq suliniutinut atugassanik aammalu meeqqat pisinnaatitaaffiisa nunatsinni Danmarkimilu siammarterneqarnissaannik sulissuteqartuulluni.
  • UNICEF Danmark 2011-imi Kalaallit Nunaanniilerpoq, 2019-imilu Nuummi allaffeqalerluni.
  • Meeqqat atugaat pisinnaatitaaffiilu pillugit Kalaallit Nunaanni suliniutit arlaqarput, taakkulu ilagaat NAKUUSA, UNICEF-ip Namm. Oqartussallu ingerlataat. NAKUUSA-p meeqqat akuutinneqarnerunissaat sulissutigaa Meeqqat Isummersorfiilu aqqutigalugit, taamattaaq inersimasut pissusaannik allannguiniarluni suliniutit paasititsiniaanerillu meeqqat toqqissisimanerulernissaannik siunertallit ingerlanneqartarput.