Pisiffimmi sulisut inuusuttut tapersersorteqalissapput
Pisiffimmi sulisut inuusuttut siunissamut tapersersortimit ilitsersorneqarnermik taperserneqarnermillu pissarsiaqarsinnaalissapput. Tassaavoq Pisiffiup aamma Kalaallit Nunaanni UNICEF-ip akornanni suleqatigiinnermut nutaamut toqqammavigisaat, suliffimmi inuusuttut atugarissaarnerannik annertusaasussaq.
Qanittukkut Pisiffimmi meeqqanik isiginnittariaatsip aamma meeqqanut politikkip oqaasertalersornissaa, aammalu suliffimmi sulisunut 18-iliisimanngitsunut tapersersorteqarnermut aaqqiissutip pilersinnissaa pillugit suleqatigiinnissamik isumaqatigiissummik Pisiffimmi qullersaaneq Per Steen Larsen, UNICEF Danmarkimi generalsekretæri Susanne Dahl, aamma Kalaallit Nunaanni UNICEF-ip Allaffiani programchefi Maliina Abelsen atsiuipput.
Suleqatigiinnerup suliffimmi inuusuttut atugarissaarnerat aammalu suliffimmut attaveqarnerat nukittorsassavai. Tapersersorteqarnermut aaqqiissutip aamma inuusuttut taakku sulianut tunngasunut piginnaasaat, inuttullu ineriartornerat nukittorsassavai, suliffeqarfimmilu siunissaannut piginnaaneqalersissallugit.
”Inuusuttut ilaannut suliffimmi inissinniarneq ajornarsinnaasarpoq, ajoraluartumillu – soorlu suliffiit allat assigalugit – inuusuttut arlallit tunuaannartarnerat misigisarparput. Suliffimmi inuusuttut taakku pitsaanerusumik atugaqalersinniarlugit, taavalu ilinniagaqalernissamut, suliffimminnik attassiinnarnissamut aamma suliffimmi qaffakkiartornissamut tunngavissinnissaannut Pisiffiup tungaanit ikiorusuppagut. Taamaattumik UNICEF-ilu taama ittumik suleqatigiissuteqarnissaq toqqarparput,” Per Steen Larsen nassuiaavoq.
”Pisiffiup suliaqarnerata meeqqanik isiginnittaatsimik aamma tapersersorteqarnermik aaqqiissummik atugassaqartissinnaanerat assorsuaq nuannaarutigaarput – taamaalillutalu inuusuttut amerlanerit suliffeqarfimmi aallartilluarnissaannut, atugarissaarnissaannut, aammalu inuunerminni suliffimmilu qaffakkiartornerminni pitsaasumik tunngavissaqalernissaannut ilalersuisinnaavugut”
Ilaatigut Naalagaaffiit Peqatigiit Meeqqat Pisinnaatitaaffii Pillugit Isumaqatigiissutaannik tunngaveqartumik meeqqanik isiginnittaatsimut siunnersuutip ineriartortinnissaa UNICEF-ip ilalersuutigaa. Meeqqanik isiginnittaaseq Pisiffiup meeqqanut inuusuttunullu politikkianut tunngaviliissaaq. Aamma tapersersortinik ilinniartitsinissamut ilinniusiat ineriartortinnerinerinut, aammalu taakku ingerlataqarnerisa nalaanni ilitsersortarnissaannik UNICEF ilalersuisuuvoq.
”Pisiffiup suliaqarnerata meeqqanik isiginnittaatsimik aamma tapersersorteqarnermik aaqqiissummik atugassaqartissinnaanerat assorsuaq nuannaarutigaarput – taamaalillutalu inuusuttut amerlanerit suliffeqarfimmi aallartilluarnissaannut, atugarissaarnissaannut, aammalu inuunerminni suliffimmilu qaffakkiartornerminni pitsaasumik tunngavissaqalernissaannut ilalersuisinnaavugut,” Maliina Abelsen erseqqissaavoq.
Suliniut tassaavoq Pisiffiup piujuartitsinissamut periusissiaata ”Nerisat, Avatangiisit aamma Inuit” (”Mad, Miljø og Mennesker”) ilaa, tassaavorlu atorfinitsinneqartuartartut inuusuttut sulisut 100-t missaasa akornanni sulisut taarseraannerannik annikillisaasussatut pilersitat arlallit ilaat.
Illuatungeriit pillugit paasissutissat
Pisiffik A/S tassaavoq Kalaallit Nunaanni atugassanik pisiniarfeqarfinni ataqatigiiaani annerpaaq, tassaniillutik pisiniarfittut najoqqutassiat 13-it, tassaavorlu Kalaallit Nunaanni illoqarfinni anginerpaani arfinilinni pisiniarfinnik 50-it sinnerlugit ingerlatsisoq. Pisiffiup atugassanik najoqqutassiat ingerlatai tassaapput Pisiffik Supermarked, Spar, Akiki, Torrak Fashion, Elgiganten, ILVA, SuKu JYSK, Pisattat, Nota Bene, Sunset Boulevard, kiisalu internettikkut pisiniarfik. Tamakku saniatigut Kalaallit Nunaanni tamarmi KK Engros aamma KK Cash & Carry’tut pisiniarfiit aqqutigalugit Pisiffiup niuertunik pilersuineq ingerlappaa.
UNICEF tassaavoq nunarsuarmi meeqqanut aaqqissuussiffinni annerpaaq, meeqqat aniguinissaannik inuunerminnilu atuilluarnissaannik isumaginninniarlutik nunarsuarmi nunat tamarmik siuttuuffiginniffiat. UNICEF-imut toqqammavigisaq tassaavoq Naalagaaffiit Peqatigiit Meeqqat Pisinnaatitaaffii Pillugit Isumaqatigiissutaat, 1993-imi Kalaallit Nunaata akuerisaa. Kalaallit Nunaanni UNICEF allaffeqarfimmigut meeqqat pisinnaatitaaffiinik, meeqqat pitsaanerusumik inuuneqarnissaannik, aammalu Naalagaaffiit Peqatigiit Meeqqat Pisinnaatitaaffii Pillugit Isumaqatigiissutaanik, meeqqanillu isiginnittaatsimik meeqqat inersimasullu akornanni annertunermik ilisimasaqalernissamut sammisalinnik ingerlanneqartuartunik iliuuserisanik isumannaariniarpoq.