Suliatsinnut tunngasut
Meeqqat tamarmik inuuginarnissaminnut ingerlalluarnissaminnullu pisinnaatitaaffeqarput
Meeqqat tamarmik inuuginarnissaasa ingerlalluarnissaasalu angunissaannut ikiuilluni UNICEF suliaqarpoq, meeqqat peqqissutut nukittuutullu peroriartorsinnaaniassammata. Kikkuugaluarunik sumiluunniit najugaqaraluarunik apeqqutaatinnagu.
Nunarsuarmiut meerartaat ukiuni kingullerni 30-ni siuariarujussuarsimapput. Assersuutigalugu 1990-mut sanilliussissagaanni ullumikkut meeqqat tallimat inorlugit ukiullit affaat qaangerlugit amerlassusillit inuuginnartarput.
Nunarsuarpulli tamakkerlugu meeqqat millionilippassuit suli katataaqqapput. Meeqqat ineriartornerup pitsaasortaanik iluaquteqartitaanngitsut, iluamik nerisassaqannginnamik, minguitsumik imigassaqannginnamik, akiuussutissanik nakorsaaserneqarneq ajoramik, nakorsaatinik nakorsanillu ikiorneqarnissamik amigaateqaramik, peqqinnissaqarnikkullu nalinginnaanerpaatigut ikiorneqarneq ajoramik.
Meeqqat tallimat inorlugit ukiullit 5,4 millionit 2017-imi toqupput, tamannalu pinngitsoortinneqarsimasinnaagaluarlunilu pinaveersimatinneqarsinnaagaluarpoq. Ullummi tamarluinnaasa meeqqat 15.000-ngajaat toqusarput. Taakkunani 7.000-it inunngoriitsiarlutillu toqusarput. Meeqqat amerlanerpaartaat malaria, timminneq, puammikkullu aseruuttoornerit toqussutigisarpaat, taakkua pisariitsumik akikitsumillu katsorsarneqarsinnaagaluarput.
Meeqqat tallimat inorlugit ukiullit 40 procentii naammaginartumik ineriartorsinnaanngillat periarfissaagaluartullu angunngisaannassallugit, qaratsamut timimullu ineriartortitsisumik nerisilluartarnatillu, paaqqutarilluarneqannginnamik ineriartornartumillu aallunneqannginnamik.
Meeqqat tamarmik ilinniarnissaminnut ilinniagaqarnissaminnullu pisinnaatitaaffeqarput
UNICEFip meeqqat atualernissaannut pitsaasumillu ilinniagaqarnissaannut ikiortarpai, pisinnaasatik tamakkiisumik atorlugit piviusunngortitsiniassammata pitsaasumillu siunissaqalernissartik anguniassammatigit. Kikkuugaluarunik aammalu sumiluunniit najugaqaraluarunik apeqqutaatinnagu.
Ilinniagaqarneq siunissagissaartitsinissamut matuersaataammat. Taamaattumik nunarsuarmi meeqqat tamarmik pitsaasumik ilinniagaqarnissaminnut periarfissaqassasut UNICEF isumaqarpoq.
Ukiuni kingullerni 20-ni siuariarujussuartoqarsimavoq. Meeqqat tunngaviusumik atualerneq ajortut 2000-miit 2015-imut 100 millioniniit 61 millioninut ikileriarsimapput. Taamatulli pitsaasumik ineriartortoqarnera ajoraluartumik ukiuni kingullerni unissimavoq.
Meeqqat ilinniarnissaannut ilinniagaqarnissaannullu aporfissaqaqaaq
Meeqqat ilinniagaqarnissaminnut pisinnaatitaaffeqarnerisa piviusunngorsinnaannginnerinut assigiinngitsorpassuit patsisaapput. Nunarsuatsinni piitsuussuseq meeqqat atuariartortannginnerannut ilinniagaqannginnerannullu patsisaanerpaavoq. Sorsunnerit sivisuut soorlu Syriami Yemenimilu pisut patsisaallutik meerarpassuit 27 millionit atuarneq ajorput qimaanngikkunik atuarfiat aseruatitersimasarami. Aammali suiaassuseq, najugaqarfigisaq, inuiattullu kinaassuseq patsisaasinnaasarput meeqqat ilinniagaqarsinnaanissaannut.
2016-imi nunarsuarmi meeqqat suli atualinngitsut affaasa, meeqqat atuarfianniittussaagaluit 61 millionit, inuusuttullu 142 millionit ilinniagaqarnissamut ilikkagaqarnissamullu periarfissat amigaatigaat.
Ilinnniartitsineq naammattumik pitsaassuseqanngitsoq meeqqat ilinniagaqarnissamut periarfissaannut aporfiusinnaasunut ilaavoq. Nunarpassuarni amerlavallaartuni atuartitsinerup pitsaassusaa atuarfigisallu periarfissarititaasa ajorpallaarnerujussuisa kingunerisaannik meeqqat ilikkagaqarnissaraluat pitsaasumillu ilinniagaqarnissaraluat ajoqusertarpaa. Meeqqat 130 millionit missaannik amerlassusillit 4. klasse angusarpaat atuarneq matematikkilu ilikkagaqarfiginagit.
”Atuarfimmi atuartitsissutit tamaasa nuannareqaakka, pingaartumik arabiamiutut oqaatsit. Inersimasunngoruma atuakkiortunngorusuppunga”, arfineq-marlunnik ukiulik Nura oqarpoq.
Nurap atuarfia Somaliami illoqarfimmi Ainabomiippoq. UNICEFimit tapiissutisisarpoq, atuaqatigiit inaannik ataatsimik utaqqiisaasumillu atuartitsisarfinnik marlunnik sanatitsimasumit. Taakku saniatigut UNICEF aamma atuarfimmi imeqarfiliisimavoq, atuartullu 200-t uniformissaannik isumagalugit.
© UNICEF/2017/Rich
Pisinnaatitaaffiit tamarmik pinngitsoqarani meeqqanut tamarluinnarnut atuunnerannik tunngaviusoq. Naalagaaffiup pisussaaffigaa meeqqat tamaasa assigiinngisitsinermut illersussallugit.
Meeqqat tamarmik persuttartinnissamut, atornerlugaanissamut kanngutsaatsuliorfigineqarnissamullu illersorneqarnissartik pisinnaatitaaffigaat
Nunarsuatta toqqissisimanartumik meeraalluni peroriartorfigineqarsinnaalernissaa UNICEFip anguniagaraa. Sutigut tamatigut tamanna sulissutigaarput. Inatsisit inunnillu isumaginnittoqarfiit pitsanngorsaaffigineqarnissaat anguniarlugu nunarsuarmi naalakkersuisut suleqatigisarpagut, tassa meeqqat persuttarneqarnissaannut, atornerlugaanissaannut kanngutsaatsuliorfigineqarnissaannullu illersorneqarnerulernissaat anguniarlugu.
Ullut tamarluinnaasa meeqqat tusindtilippassuit assigiinngitsutigut kanngutsaatsuliorfigineqartarput:
- Niviarsiaqqat 12 millionet ukiut tamaasa18-inik ukioqaleratilluunniit katitsitaasarput.
- Nunarsuatsinni niviarsiaqqat arnallu 200 millioninik amerlassusillit kinguaassiutimik malussaataatigut kipineqartarput anniarnernik kinguneqartitsisartumik.
- Meeqqat 550 millionet ullut tamaviisa timikkut annersagaallutik pillarneqartarput.
- Inuusuttuaqqat 13-15inik ukiullit 130 millionet nikassarneqartarput.
- Meeqqat 732 millionet inuupput nunaminni atuarfinni annersaalluni pillaasarnerit suli akuersaarneqarlutik atugaasuni.
- Minutsit arfineq aappassai tamaviisa inuusuttuaraq toqusarpoq persuttaanerit kingunerisaannik.
- Niviaqqat inuusuttuaqqat 15 millionet 15-19-inik ukiullit kinguaassiutitigut kanngutsaatsuliorfigineqarsimapput.
Nunarsuaq tamakkerlugu inuit pisinnaatitaaffiinik unioqqutitsinerit amerlanersaat suli tassaasarput niviarsiaqqanut persuttaanerit. Taamaattumik UNICEFip niviarsiaqqanut persuttaasarnerit akiornissaat immikkut eqqumaffigalugit pinaveersimatinniarpai.
Inuusuttuaqqat arnat 940.000-it nulianngortinneqarnissaat pinngitsoortinniarlugu inuunermi pisinnaasassat pillugit ilinniagaqarnissamut ikiorneqarsimapput atuartinneqarlutillu.
Foto: © UNICEF/2017/Vishwanathan
Silap allanngoriartorneranut meeqqat illersorneqartariaqarput
Meeqqat peroriartornerannut toqqissisimanerannullu iluaqutaasumik tamarmik avatangiiseqartariaqarput. Nunarsuarmili meeqqat millionilippassuit inuunerat inuunerissaarnissaallu silap allanngorneranik, mingutsinneqarneranik, imissaarusimaarnermik, pinngortitamik ajunaarnersuarnik pilersaarutaanngitsumillu illoqarfissuarnut noorarnernik akornuserneqariaannaapput.
Meeqqat inuusuttullu aatsaat taamak amerlatigisut maannangaaq ajunaarnersuaqarfimmiipput, piaartumik inunnut immikkut ikiusoqarnissaanik pisariaqartitsiffiusuni. Pinngortitami ajunaarnersuit, silallu allanngornerata kingunerisaannik meeqqat millionilippassuit angerlarsimaffimminnit qimaguttariaqarsimapput, taamaattumillu persuttagaanissamut, atornerlugaanissamut, nerisakippallaalernissamut, nappaatinullu uloriarnartunut qanillisimapput.
Nunarsuatsinni meeqqat 300 millionit silaannaq anersaartorfigissallugu toqunarsisimasoq najugaqarfigaat. Inuit 2,3 milliardet perusuersartarfiit nalinginnaanerpaat amigaatigaat. Inuit 159 millionet kuunnut, tatsinullu imertartarput imeq peqqinnarnersoq ilisimanagu. Imissaaleqineq ajornartorsiutaagaluttuinnarpoq. 2040-mi nunarsuatsinni meeqqat sisamaagaangamik ataaseq imissaaleqiffiusumi najugaqartussaassaaq.
Inuit 43,6 millionit ajorsarnertik pillugu ikiorserneqartariaqartut UNICEFimit imermik minguitsumik isumagineqarsimapput.
© UNICEF/Clarke for UNOCHA
Meeqqat tamarmik inuunerminni naapertuilluartumik periarfissinneqarnissaminnut pisinnaatitaaffeqarput
Meeqqat tamarmik naapertuilluartumik periarfissinneqartariaqarput pisinnaasatillu tamaviisa atorlugit angusaqarnissaminnut periarfissinneqartariaqarlutik. Nunarsuatsinni meeqqat millionilippassuit periarfissinneqarsinnaaneq ajorput pitsooqigamik, aporaaffimmiikkamik, immikkoortinneqaramik najugaqarfimminniluunniit allatigut akornusersorneqarnertik pissutigalugu, imaluunniit suiaassusaat suunersoq patsisigalugu. Meeqqat inuunerminni naapertuilluartumik periarfissinneqarnissaminnut tunineqanngikkunik, inuuneri naallugit tamanna sunniuteqartarpoq taakkununngaannaanngitsoq aammali inuiaqatigiinnut sunniuteqartumik, tassami assigiinngissuseq sutigulluunniit amigaateqarneq pissutaallutik kinguaariippassuarni sunniuteqartumik meeqqat piitsutut inuunissamut siunissaqartitaasaramik.
Qimaasoqarsinnaavortaaq namminneq nunaminniikkaluartunik, soorluli meeqqat syriamiut Syriap nunaata iluani qimaasunut najugaqarfissianiittut taamaattut. Inuit allat 4 millionit sorsunneq pissutigalugu nunanut saniliminnut qimaasimapput.
© UNICEF/2018
Meeqqat tamarmik inuunerminni naapertuilluartumik periarfissinneqarnissaat anguniarlugu UNICEF sutigut tamatigut suliuniuteqarluni iliuuseqarpoq. Soorlu ilaqutariit piitsut aningaasanik tapiiffigisarpagut inuussutissaqarniassammata taamasillutillu meeqqamik atuarnissaat peqqissuunissaallu salliussinnaaniassammassuk. Tamatigoortumik iliuuseqartarpugut qulakkeerniarlutigu niviarsiaqqat nukappiaqqatulli tamarmik periarfissinneqarnissaat anguniarlugu – ingammik ilinniagaqarsinnaanissap tungaatigut. Meeqqat qimaasut illersortarpagut ilaquttaminnik najuilernissaat anguniarlugu, qimaasoqarfimmilu meeqqanut tulluussakkanik periarfissiisoqarnissaa isumaginiartarparput, meeqqallu qimaasut kingunipiloqarsinnaasunik misigisaqarsimanerisa qaangerniarnissaannut, tarnikkut isumaginninnikkullu ikiorneqarnissaannut periarfissinneqarnissaat isumagisarparput.
Pitsaasumik sulisarpugut nunarsuarmilu meeqqat ikiorniarlutigit piviusunngortitsisumik ineriartortitsineq akuliuttarlutigu
Nunani naalagaaffeqataasunilu 190-inik amerlassusilinni UNICEF meeqqanik ikiuisarpoq, meeqqanut suliniaqatigiiffinnit tamanit amerlanerusunik sullitaqartarluni. Sumiiffinni pisortat naalakkersuisullu suleqatigisarpagut, NP-ni Kattuffiit allat, meeqqanillu suliniaqatigiiffiit allat suleqatigisarpagut misilittagarpassuagut ilisimasaqassuserpullu atorluarlutigit meerarpassuit annaattarpagut ullullu tamaviisa inuunerannik pitsannguisitseqataasarluta.
Misilittakkat angusallu pitsaasut nunami ataatsimi pissarsiarisagut imaluunniit sumiiffimmi ataatsimi pissarsiarisagut nunami allami atorsinnaasarpagut. Pinartumik ikiuigasuarsinnaaneq ungasinnerusumut isigaluni ineriartortitsinissamut pilersaarusiornermut ilanngunneqartarpoq. Nunarsuaq tamakkerlugu attaveqarluaratta nunarsuatsinni meeqqanut tamanut sullissiniarnitsinni angusaqarluarsinnaasarpugut.
Nunarsuatsinni meeqqanut pilersuinitsinni niueqatigisatsinnik sunniiniartarpugut siunertalimmik anguniagaqartaratta, qulakkeerusukkatsigulu akit pitsaanerpaat aningaasallu amerlanerpaat ukiuinissamut atorneqartarnissaat. Suliffeqarfiit aningaasaateqarfiillu suleqatigillualertarpagut. Ilisimatusarneq aammalu kingunilimmik ineriartortitsineq kivitsisoralugit siumukarneq pilersittarparput nunarsuarmilu meeqqat TAMAASA ataavartumik pitsanngorsaaffigisarlutigit.
Meeqqat illersorneqarnerat
Meeqqat immikkut ittumik illersorneqarnissaq pisariaqartittarpaat. Naalagaaffiit Peqatigiit Meeqqat Pillugit Isumaqatigiissutaanni allassimavoq meeqqat tunngaviusumik pisariaqartitaat tamaviisa qulakkeerniarlugit suliniartoqassasoq. Illoqarnissaq, toqqissisimanissaq paaqqutarineqarnissarlu kisimik pineqanngillat, aammali inuttut immikkut pisinnaatitaaffilittut pineqarnissaq ilaavoq.
Meeqqat tamarmik pisinnaatitaaffeqarput
Naalagaaffiit Peqatigiit Meeqqat pillugit Isumaqatigiissut ataatsimeersuarnermini 20. november 1989-imi akuersissutigaat. Inuit Pisinnaatitaaffiinut tunngatillugu meeqqat naliginnaasumik ilaareeraluarput, meeqqanullu tunngasumik immikkut ittumik pisinnaatitaaffeqarnissaq pisariaqarpoq – tassa meeqqat pisinnaatitaaffiinik.
Nunat 190-inik amerlanerusut atsioqataasimapput. Taamaalilluni taanna isumaqatigiissut nunarsuarmi isumaqataaffigineqarnerpaajulluni peqataaffigineqarnerpaanngorpoq. Meeqqat Pisinnaatitaaffii pisinnaatitaaffiupput meeqqanut TAMANUT tunngasut, sumiuugaluarunik, qanoq suiaassuseqaraluarunik, inuiaqatigiinni qanoq inissisimagaluarunik, qanoq upperisaqaraluarunik aammalu kultureqaraluarunik apeqqutaanngilaq. Isumaqatigiissummi oqaasertaavoq meeqqat tamarmik inuuginnarnissaminnut pisinnaatitaaffeqartut. Aammalu pisinnaatitaaffigigaat peqqinnartumik toqqissisimanartumillu peroriartornissartik aammalu ineriartornissartik.
Meeqqat atornerluinernut illersorneqarnissartik pisinnaatitaaffigaat taamatuttaaq inuttut immikkoortinneqarnissamut illersorneqartussaallutik, atuariartornissaminnut pisinnaatitaaffeqarput siunissaminnullu sunniuteqarnissaminnut pisinnaatitaaffeqarlutik.
UNICEFip meeqqat pisinnaatitaaffii ilungersuutigaat
Naalagaaffiit Peqatigiit meeqqanut kattuffiattut UNICEFp suliassaraa Meeqqat Pisinnaatitaaffiisa malinneqarnissaat ilungersuutigissallugit. UNICEFip suliniarnerani Meeqqanut Isumaqatigiissut suliassaavoq pingaaruteqartorujussuaq. Nunani naalakkersuisuusut taamani atsioramik neriorsuutaannik eqqaasittuartarpagut, isumaqatigiissummilu allagaqaatit malinnissaasa piviusunngortinnissaannut pimoorussitinniartarlutigit.
Tamakkua saniatigut UNICEF aningaasatigut tapiisarpoq, teknikkikkut ikiuisarluni, ilinniartitsisunik atorfilittanillu pikkorissaasarluni, atortussanillu tunioraasarluni, nunat ataasiakkaarlutik Meeqqat Pisinnaatitaaffii Pillugit Isumaqatigiissutip allagaqaataannik piviusunngortitsiniassammata.
UNICEFip aamma suliassaraa nammineerluni Meeqqanut Isumaqatigiissut meeqqanut oqaluttuarisassallugu, ilisimaniassamassuk Kalaallit Nunaanni aammalu nunarsuarmi pisinnaatitaafffeqarlutik. Taamaaliortarpugut atuartitsinermi atugassiortarnitsigut, meeqqanik peqataatitsinitsigut, tusagassiuutitigut akuliuttarnitsigut aammalu nunani ataasiakkaani suliniuteqartarnitsigut. UNICEF Danmarkip ukiut tamaviisa meeqqat pisinnaatitaaffiisa inuuvissiorneranni Kalaallit Nunaanni nalliuttorsiortitsisarpoq malunnartitsilluni NAKUUSAlu aqqutigalugu Meeqqanik ataatsimeersuartitsisarluni.
Qanoq iliorsinnaavit?
Meeqqat Pisinnaatitaaffiisa ilungersuutiginerannut tapersiillutit peqataasinnaavutit tassuunakkullu suleqataaffigalugu nunarsuaq tamakkerlugu meeqqat naapertuilluartumik inuuginnarnissaannut ineriartortuarnissaannullu periarfissinneqarnissaannut suleqataallutit.
UNICEFip suliaasa ilagaat nunani ataasiakkaani naalakkersuisut peqatigalugit meeqqat ilinniatitaanissamut pisinnaatitaaffiinik eqquutsinneqarnissaat. Soorlu suliatta ilagaat atuarfinnut akiliutit atorunnaarsinneqarnissaat, taamaalilluni ilaqutariit aningaasaqarnerat meeqqap atualernissaanut apeqqutaajunnaarniassammat.
© UNICEF/2016/Llaurado
Meeqqat inuuginnarnissaminnut pisinnaatitaaffeqarput. Pisinnaatitaaffik tamanna eqquutsinniarlugu UNICEF akiuussutissanik nakorsaatinillu nunarsuarmi atugarliorfiusunut tunisisarpoq.
© UNICEF/2016/Dejongh
UNICEF Danmarkip meeqqat pillugit anguniagai
Takorluugaq piviusunngoraangat
Anguniakkat meeqqanut tunngasut piviusunngortinniakkat
UNICEF Danmarkip anguniakkat meeqqanut tunngasut pingasut 2021 tungaanut piviusunngortikkusuppai. Naalagaaffiit Peqatigiit Nunarsuaq tamakkerlugu anguniagaannut taamaalilluta taperseeqataassagatta. Meeqqat pillugit anguniakkani aallaavigineqarput UNICEFip nunarsuaq tamakkerlugu anguniagai. Tamarmillu ataqatigiissuupput.
Meeqqat nunarsuaq tamakkerlugu anguniakkani
Kikkut tamarmik akisussaaffeqarput – nunarsuatsinnut maannakkorpiaq siunissamilu kinguaariit takkuttussat eqqarsaatigalugit. UNICEFip nunarsuarmi meeqqat tamaviisa sullitarai nunarsuarmilu nunanit pingaarnertut inissinneqarsimalluni meeqqat pisinnaatitaaffiinik qulakkeerinnittussatut. Nunat tamalaat akornganni ukiut 70-it sinnerlugit tamanna suliniutigereerparput.
Naalagaaffiit Peqatigiit Nunarsuarmi anguniagaanni pitsaanerusumik siunissaqarnissamut takorluukkat annertoqaat ataatsimoorussaasussaallutillu. Taamaattuminguna UNICEFip nunani tamalaani 2030-p tungaanut angusassat allattorsimagai.
Immikkoortuni tallimani pingaaruteqartuni UNICEFip nunarsuarmi meeqqat atugaat allannguiffiginiarpai
Nunarsuaq tamakkerlugu
meeqqat tamarmik
peroriartussapput persuttaaffiunanilu
kanngutsaatsuliorfiunngitsumi
Nunarsuaq tamakkerlugu
meeqqat tamarmik
peroriartussapput
nunarsuarmi piujuartumi,
minguitsumi toqqissisimanartumilu
UNICEF Danmarkip meeqqanut anguniagai pingasut
Danmarkimi meeqqanut tunngatillugu pingasunik anguniagaqarpugut- kisitsisit aalajangersimasut iliuuseqarfissallu, meeqqat sanngiitsumik inissisimasut siumukalernissaat anguniarlugu qulakkeerinnittussat. Ukunani nikisitsinerpaanissarput naatsorsuutigaarput:
MEEQQAT PILLUGIT ANGUNIAGAQ 1
Meeqqat 750.000-it pitsaasumik atuartinneqarnissaat qulakkeerusupparput.
Ingammik niviarsiaqqat nukappiaqqallu qimaasut eqqarsaatigalugit.
MEEQQAT PILLUGIT ANGUNIAGAQ 2
Meeqqat 1,5 millioninik amerlassusillit inuunerminni ullunik 1.000-inik siullernik qaangiilluarnissaannut qulakkeerinnikkusuppugut, tassa atualernissaat tikivillugu.
MEEQQAT PILLUGIT ANGUNIAGAQ 3
Ikinnerpaamik meeqqat 500.000-inik amerlassusillit inuunerisa annaannissaat anguniarlugu ikiuerusuppugut, pinngortitamik ajunaarnersuaqartillugu, sorsuttoqartillugu aporaattoqartillugulu.
MEEQQAT PILLUGIT ANGUNIAGAQ 1
Meeqqat 750.000-it pitsaasumik atuartinneqarnissaat qulakkeerusupparput.
Ingammik niviarsiaqqat nukappiaqqallu qimaasut eqqarsaatigalugit.
Meeqqat amerlanerit atuariartortalernissaat qulakkerusupparput. Ullumikkut meeqqat 59 millionit atuariartorneq ajorput. Taakkua 52 procentii niviarsiaraapput. Afrikap kitaani qeqqanilu meeqqat amerlanersaat atuariartorneq ajorput.
© UNICEF/2017/Ergen
Meeqqat atuarfiini annerni atuartut amerlanerit soraarummeertarnissaat qulakkeerusupparput. Nunarsuaq tamakkerlugu meeqqat atuarfianni akullerni atuarneq taamaallaat meeqqat 56 procentiisa naammassisarpaat, taamaallaallu atuartut 38 procentiisa annerni atuarfik naammassisarlugu.
© UNICEF/2016/Schermbrucker
Inuusuttut suliffissaqalernissaat periarfissagissaarnerulersikkusullutigu pisortatiguunngitsumik ilinniartitserusuppugut. Inuusuttut 71 millionet suliffissaaleqisuupput, inuusuttullu 156 millionit piitsutut inuupput akissarsiakinneq sulinermilu atukkat pitsaanngitsut peqqutaallutik.
© UNICEF/2018/El Baba
MEEQQAT PILLUGIT ANGUNIAGAQ 2
Meeqqat 1,5 millioninik amerlassusillit inuunerminni ullunik 1.000-inik siullernik qaangiilluarnissaannut qulakkeerinnikkusuppugut, tassa atualernissaat tikivillugu.
Nappaatinut inuunermik navianartorsiortitsisunut meeqqat illersorusuppagut. Meeqqat tallimat inorlugit ukiullit 2016-imi 5,6 millionit toqupput. Meeqqat amerlanersaasa nappaatit nalinginnaalluinnartut, soorlu timminnerit, puamminillu aseruuttoornerit, pinaveersaartinnissaat katsorsarnissaallu ajornanngikkaluaqisut toqqutigaat.
© UNICEF/2018/Al-Issa
Arnat erninerminni piukkunnaatilinnik ikiorneqarnissaat qulakkeerusupparput. Arnat 300.000-it missaanniittut ukiut tamaasa toqusarput naartunerminni erninerminniluunniit ajutoortoqarneratigut, arlalitsigulli taakkua ernisussiortoqarneratigut pinngitsoortinneqarsinnaagaluarput.
© UNICEF/2018/Keita
Angajoqqaat piukkunnarsarnerorusuppagut meeqqaminnik isumaginninnissaminnut piginnaaneqarnerulersillugit. Nunarsuarmi nunani piitsuuffiunerpaani meeqqat 43 procentii tallimat inorlugit ukiullit pisariaqartitaminnik nerisassaqartinneqarnatillu, paaqqutarineqarnatillu aallunneqanngillat.
© UNICEF/2017/Dejongh
MEEQQAT PILLUGIT ANGUNIAGAQ 3
Ikinnerpaamik meeqqat 500.000-inik amerlassusillit inuunerisa annaannissaat anguniarlugu ikiuerusuppugut, pinngortitamik ajunaarnersuaqartillugu, sorsuttoqartillugu aporaattoqartillugulu.
Meeqqat ajunaarnersuarnik eqqugaanissaraluannut illersorusuppagut. Nunarsuatsinni meeqqat sisamaagaangata ataaseq nunami sorsuffimmiittarpoq, aporaaffimmi, ajunaarnersuaqarfimmiluunniit. Meeqqat 28 millionet pinngitsaaliissummik qimaasuupput.
© UNICEF/2014/d'Aki
Meeqqat nerisinneqanngippallaarsimasut katsorsarneqarnissaat qulakkeerusupparput, perlerlutik toqunnginniassammata. Meeqqat toqusut affai tassaasarput meeqqat tallimat inorlugit ukiullit naammattumik nerisinneqannginnerup kingunerisaanik toqusut.
© UNICEF/2017/Dejongh
Meeqqat ilaqutaasalu minguitsumik imermik imigassaqarnissaat isumagerusupparput. Meeqqat tallimat inorlugit ukiullit ilaat 800-it ullut tamarluinnaasa toqusarput minguitsumik imigassaqannginnerup kingunerisaanik aammalu perusuersartarfiit eqqiluisaarnermullu atortut ajoqisut patsisaallutik.
© UNICEF/2016/Al-Issa
UNICEF Danmarkip meeqqanut tunngatillugu anguniagaat nunarsuarmi anguniakkanut tulluuttuupput UNICEFillu nunarsuaq tamakkerlugu suliniarneranut allannguiniarneranullu naapertuuttuupput.